ގައުމުގައި ރައްޔިތުން ކުރަމުން ކުރަމުންދާ މުޒާހަރާތަކަށް ފުލުހުންނާ އެކު ސިފައިން ނެރުމަކީ ގާނޫނާ ޚިލާފުކަމަކަށް ވާއިރު އެކަން ތަކުރާރުކޮށް ވެރިން ކުރައްވަމުން ގެންދަވާތީ ރައީސް އަބްދުﷲ ޔާމީން ނުރުހުން ފާޅުކުރައްވައިފިއެވެ.

ޕީއެންއެފުން ބޭއްވި ޖަލްސާއެއްގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، އެމްޑީޕީއިން ހެދި ގޯސް މި ސަރުކާރުން ވެސް ތަކުރާރު ކުރަމުންދާ ކަމަށާ އެގޮތުން ގާނޫނު އަސާސީއިން ލިބިދީފައިވާ ޚިޔާލު ފާޅުކުރުމުގެ މިނިވަންކަމަށް ސަލާމަތީ ބާރުތައް މެދުވެރިކޮށް މި ސަރުކާރުން ވެސް އަރައިގަންނަމުން ދާ ކަމަށް ރައީސް ޔާމީން ވިދާޅުވިއެވެ.

އެމަނިކުފާނު ވިދާޅުވީ ދާދި ފަހުން އެމްޑީޕީއިން ކުރަމުން ދިޔަ މުޒާހަރާތައް ހުއްޓުވުމަށް ފުލުހުންނާ އެކު ކޮންމެ ރެއަކު ސިފައިން ވެސް މަގުތައް މައްޗަށް ނެރެފައިވަނީ ގާނޫނާ ހިލާފަށް ކަމަށާ އެގޮތުން ސިފައިން މަގުތައް މައްޗަށް މަދަނީ ކަމެއްގައި ނުކުންނަން ވާނީ ފުލުހުންނަށް އެކަމެއް ކޮންޓްރޯލުނުވެ ސިފައިންގެ އެހީއަށް އެދިއްޖެ ހާލަތެއް ކަމަށްވީ ނަމަވެސް ފެނިގެން ދިޔައީ ފުލުހުންނާ އެކު ސިފައިން ވެސް ނެރެ ސަރުކާރުގެ ވެރިން ގާނޫނާ ޚިލާފުވި މަންޒަރު ކަމަށް ރައީސް ޔާމީން ވިދާޅުވިއެވެ.

އެމަނިކުފާނު ވިދާޅުވީ ސިފައިންނަށް ފުލުހުންގެ ފަރާތުން މަދަދަށް އެދެން ވާނީ ވެސް ލިޔުމުން ކަމަށެވެ.

ރައީސް ޔާމީން ވަނީ ނަމަވެސް ރައީސް މުހައްމަދު ނަޝީދު ކޯޓުތަކުގެ ގާނޫނަށް ގެނައި ބަދަލާ އެކު އެއިން ކަމެއް ބެލޭނެ ގޮތެއް މިހާރު ނެތުމަކީ ހިތާމަހުރިކަމެއްގެ ގޮތުގައިވެސް ސިފަކުރައްވާފައެވެ.

ރައީސް ޔާމީން ވަނީ ހާލަތާއި ނުބައްދަލު ބާރުގެ ބޭނުން މުޒާހަރާތަކުގައި މިހާރު ބޭނުންކުރަމުންދާކަންވެސް ފާހަގަކުރައްވާ އެކަމާއި ގުޅިގެން ކަންބޮޑުވުން ފާޅުކުރައްވާފައެވެ.