އިންޑިއާ އައުޓު ގޮވަމުން ވެރިކަމަށް އައިސް ތިބި ޕީއެންސީގެ ސަރުކާރުން، އިންޑިއާ އާއެކު އަސްކަރީ ގުޅުން ވަރުގަދަކުރަން މަޝްވަރާކޮށްފިއެވެ.
ޑިފެންސް މިނިސްޓްރީއިން އެކްސްގައި ކުރި ޕޯސްޓެއްގައި ބުނީ، އިންޑިއާއާ އަސްކަރީ ގުޅުން ވަރުގަދަ ކުރުމާ ގުޅޭ ގޮތުން އަހަރަކު އެއް ފަހަރު ބާއްވާ ޑިފެންސް ކޯޕަރޭޝަން ޑައިލޮގްގެ ވަފުދާއެކު މިނިސްޓަރު ޣައްސާން މައުމޫން ބައްދަލުކުރައްވައިފައިވާ ކަމަށެވެ.
އެ ވަފުދުގައިި އިސްކޮށް ހުންނަވަނީ އިންޑިއާގެ ޑިފެންސް ސެކްރެޓަރީ ރާޖޭޝް ކުމާރު ސިންހެވެ. އެ ބައްދަލުވުމުގައި އިންޑިއާގެ ހައިކޮމިޝަނަރު ޖީ ބަލަސުބްރަމާނިއަންއާއި އަސްކަރިއްޔާއާއި އެކްސްޓާނަލް އެފެއާސް މިނިސްޓްރީގެ އިސް އޮފިޝަލުން ބައިވެރިވެވަޑައިގެންނެވިއެވެ.
ދިފާއީ ގުޅުން ވަރުގަދަ ކުރަން އިންޑިއާއާ އެކު މަޝްވަރާތައް މި ސަރުކާރުން ކުރިއިރު، މިއީ އިންޑިއާ ސިފައިން މި ގައުމުން ބާލާނެ ކަމުގެ ވައުދާ އެކު އައި ސަރުކާރެއްކަން ފާހަގަކޮށްލެވެއެވެ.
މައުލޫމާތު ލިބިފައިވާ ގޮތުގައި މިއަދުގެ ބައްދަލުވުމުގައި މަޝްވަރާ ކުރެވުނީ އުތުރު ތިލަފަލޫގައި އަޅާ ޑޮކްޔާޑުގެ ކަންކަމާ ގުޅިގެން ކަމަށްވެއެވެ.
