އިންޑިޔާގެ "ތަޕާސް" ޑްރޯންތައް ރާއްޖެ ނުގެނެސް ތުރުކީން ޑްރޯން ގެނައުމުން އެމްޑީޕީ އަށް ހަޖަމްނުވިކަން ހާމަވެއްޖެއެވެ.

އެމްޑީޕީން ބޭއްވި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ ކެމްޕެއިންގެ ތަރުޖަމާނު އަހުމަދު އީސާ ވިދާޅުވީ އެމްޑީޕީގެ ވެރިކަމުގައި އަސްކަރީ ޑްރޯން ގެނައުމަށް ގިނަ މަސައްކަތްތަކެއް ކުރެވުނުކަމަށެވެ.

އޭނާ ވިދާޅުވީ ނިމިގެން ދިޔަ އިބްރާހިމް މުހައްމަދު ސޯލިހުގެ ވެރިކަމުގައި އިންޑިޔާ އިން ރާއްޖެ އަށް ހިލޭ ޑްރޯންތަކެއް ދިނުމަށް މަޝްވަރާ ކުރެވުނު ކަމަށެވެ.

އީސަ އިތުރަށް ވިދާޅުވީ ދައުލަތުން އެންމެ އިސްކަން ދޭން ޖެހޭ ކަންކަން ގާނޫނު އަސާސީގައި ލިޔެފައި އެބަހުރި ކަމަށާއި އެކަންކަން ރައްޔިތުންނަށް ފޯރުކޮށްނުދީ، ހުއްޓާލައިގެން އެހެން ކަންކަން ކުރަން ސަރުކާރުން އުޅެގެން ނުވާނެ ކަމަށެވެ.

އެހާ އަގުބޮޑުކޮށް ޑްރޯންތައް އަވަސް އަރުވާލައިގެން ގަނެފައިވަނީ އީސަ ވިދާޅުވި ގޮތުގައި، ރައްޔިތުންގެ މަޖިލީހުގެ އިންތިހާބަށް ފައިސާ ހޯދުމަށް ކަމަށް ވަރަށް ބޮޑަށް ގަބޫލު ކުރެވޭ ކަމަށެވެ.

ރައީސް ޑރ. މުހަައްމަދު މުއިއްޒު ތުރުކީ އަށް ކުރެއްވި ރަސްމީ ދަތުރުފުޅުގައި، އެ ގައުމުން އުފައްދާ އަސްކަރީ އުޅަނދުތައް ބެއްލެވި އެވެ.

އަދި، ރާއްޖެ އަށް އަސްކަރީ ޑްރޯން ހޯދުމަށް ތުރުކީގެ ކުންފުންޏަކާ އެކު އެއްބަސްވުމެއް ހެދި އެވެ. އެ އެއްބަސްވުމުގެ ތަފުސީލެއް މިހާތަނަށް ސަރުކާރުން ހާމަކޮށްފައެއް ނުވެ އެވެ. ރާއްޖެ އިން ޑްރޯން ގަތުމަށް ހަމަޖެހިފައިވަނީ ކިހާ ފައިސާއެއް ހަރަދުކޮށްގެން ކަމެއް ވެސް ސަރުކާރުން މިހާތަނަށް ހާމަކޮށްފައެއް ނުވެ އެވެ.

ނަމަވެސް އެ އެއްބަސްވުމުގެ ދަށުން ރާއްޖެ އަށް އަސްކަރީ ޑްރޯންތަކެއް މިހާރު ގެނެސް އެ ބޭނުންކުރަން ފެށުމުގެ ތައްޔާރީތައް ވަމުން އަންނަ ކަމަށް ވަނީ މައުލޫމާތުދީފައެވެ.

އޭގެ ފޮޓޯތަކެއް ވެސް ސޯޝަލް މީޑިއާގައި ވަނީ އާންމުވެފައެވެ.

ތުރުކީގެ ޑްރޯންތައް ބޭނުންކުރާނެ ގޮތުގެ ތަމްރީނު ހޯދުމަށް ދިވެހި ސިފައިންގެ ހާއްސަ ޓީމެއް މިހާރު ވެސް ވީ އެ ގައުމުގައިކަމަށް ޑިފެންސް މިނިސްޓްރީން ވަނީ މައުލޫމާތުދީފައެވެ.