އީރާނުގެ ތެހެރާނުގައި ހުންނަ ޕާކިސްތާނުގެ އެމްބަސީ ކައިރިއަށް އަމާޒުކޮށް އިސްރާއީލުން ދިން ހަމަލާތަކާ ގުޅިގެން، ނިއުކްލިއަރ ބާރު ލިބިފައިވާ ޕާކިސްތާނުން ސަހްޔޫނީ ދައުލަތަށް ވަރުގަދަ އިންޒާރެއް ފޮނުވައިފިއެވެ.
ޕާކިސްތާނުގެ ސަރުކާރުން ނެރުނު ބަޔާނެއްގައި ބުނެފައިވަނީ، ޕާކިސްތާނަކީ ޤަތަރު ނޫން ކަމަށާއި، ދުނިޔޭގެ ކޮންމެ ތަނެއްގައި ތިބި އެ ޤައުމުގެ ޑިޕްލޮމެޓުންނަށް ނުވަތަ އެމްބަސީތަކަށް ދޭ ކޮންމެ ގެއްލުމަކަށް ވަރުގަދަ ޖަވާބެއް ދޭނެ ކަމަށެވެ. މިއީ ސަހްޔޫނީން އިސްލާމީ ޤައުމުތަކުގެ ސިޔާދަތަށް އަރައިގަންނަމުންދާ ދިއުމަށް ދިން ސީދާ އިންޒާރެކެވެ.
މި އިންޒާރު އައިސްފައިވަނީ ތެހެރާނުގައި ހުންނަ ޕާކިސްތާނުގެ އެމްބަސީ ކައިރިއަށް ދެވުނު ނުރައްކާތެރި ހަމަލާތަކާ ގުޅިގެންނެވެ. ޕާކިސްތާނުގެ ޚާރިޖީ އިދާރާތަކުން ބުނާ ގޮތުގައި، އެ ޤައުމުގެ ނިއުކްލިއަރ ޤާބިލުކަމަކީ ހަމައެކަނި ދެއްކުމަކަށް އޮތް އެއްޗެއް ނޫން ކަމަށާއި، ޤައުމުގެ ރައްކާތެރިކަމަށްޓަކައި ކޮންމެ ފިޔަވަޅެއް އެޅުމަށްވެސް ފަސްނުޖެހޭނެ ކަމަށެވެ.
ސަހްޔޫނީ އިސްރާއީލުން ފަލަސްޠީނާއި އިރާނަށް ދެމުންދާ ހަމަލާތައް ކުށްވެރިކުރަމުން، ޕާކިސްތާނުން ވަނީ އެމީހުންނަށް އިންޒާރު ދީފައެވެ. މިއީ ފަހުގެ ތާރީޚެއްގައި ޕާކިސްތާނުން އިސްރާއީލަށް ދިން އެންމެ ހަރުކަށި އެއް އިންޒާރުގެ ގޮތުގައި މަސްރަޙު ދިރާސާކުރާ ފަރާތްތަކުން ސިފަކުރެއެވެ.
