މާލޭ ސަރަހައްދުން ގޯތި ދޫކުރުމަށް ކުރީ ސަރުކާރުން ފެށި "ބިންވެރިޔާ" ސްކީމުގެ ދަށުން ގޯތި ލިބުނު މީހުންގެ ތެރެއިން ލިޔުން ހަވާލުނުކުރެވި ހުރި މީހުންނަށް ލިޔުމާ ހަވާލުވާން އިތުރު ފުރުސަތެއް ދޭން ހައުސިން މިނިސްޓަރީން ނިންމައިފިއެވެ.
ހައުސިން މިނިސްޓްރީން ކުރި އިއުލާނެއްގައި ބުނީ، ބިންވެރިޔާ ސްކީމުގެ ދަށުން 9،003 ގޯތި ދޫކުރި ނަމަވެސް، ބިން ލިބުނު ކަމުގެ ލިޔުމާ މިހާތަނަށް ހަވާލުވީ 8،394 މީހެއް ކަމަށެވެ.
ބިމުގެ ރަޖިސްޓަރީ އާއި ލިޔުމާ ހަވާލުވާން މާދަމައިން ފެށިގެން އަންނަ ހަފުތާގެ ބުދަ ދުވަހުގެ ނިޔަލަށް އިތުރު ފުރުސަތެއް ދިނުމަށް ނިންމާފައިވާ ކަމަށް މިނިސްޓްރީން ވަނީ ހާމަކޮށްފައެވެ.
އެ މުއްދަތުގައި ލިޔުމާ ހަވާލުވާން ބޭނުންވާ ފަރާތްތަކުން ހައުސިން މިނިސްޓްރީގެ ހިޔާވެހި ޕޯޓަލް މެދުވެރިކޮށް އެޕޮއިންޓުމެންޓެއް ހައްދަން ޖެހޭނެކަމަށެވެ.
ބިންވެރިޔާ ސްކީމުގެ ދަށުން ކުރީ ސަރުކާރުން ހިލޭ ބިން ދޫކުރީ ހުޅުމާލެއާއި ގިރާވަރުފަޅު އަދި ގުޅީފަޅުންނެވެ.
އެގޮތުން، ހުޅުމާލެއިން 1351 ގޯއްޗާއި ގުޅީފަޅުން 2219 ގޯއްޗާއި ގިރާވަރުފަޅުން 5433 ގޯތި ވަނީ ދޫކޮށްފައެވެ.
