ރައީސް އަބްދުﷲ ޔާމީންގެ ފަރާތްޕުޅުން ދިވެހިރާއްޖޭގެ ހައިކޯޓަށް ހުށަހަޅާފައިވާ އިސްތިއުނާފުގެ މައްސަލަ އަދި ނުނިމި ލަސް ނުވާކަމަށް ހައިކޯޓުން ބުނަމުންދާ ދިއުމަށް ރައްދުދެއްވައިފިއެވެ.

ރައީސް ޔާމީންގެ މައްސަލައިގައި ހައިކޯޓުން އެ މައްސަލަ ލަސްނުވާކަމަށް ތަކުރާރުކޮށް ބުނަމުންދާ ދިއުމަށް ރައްދު ދެއްވީ އެމަނިކުފާނުގެ ގާނޫނީ ވަކީލު އަލްއުސްތާޛު އާދަމް ޝަމީމެވެ.

ރައީސް ޔާމީންގެ ފަރާތްޕުޅުން ހައިކޯޓަށް ހުށަހަޅާފައިވަނީ 2022 ވަނަ އަހަރުގެ ޑިސެމްބަރު މަހު ކުރިމިނަލް ކޯޓުން، ވ.އާރަށުގެ މައްސަލައިގައި އިއްވި 11 އަހަރު ދުވަހުގެ ޖަލު ހުކުމާ އަދި ޖޫރިމަނާ ފައިސާގެ މައްސަލައެވެ.

ޖޫރިމަނާ ފައިސާގެ މައްސަލައިގައި ފައިސާ ދެއްކުން މަޑު ޖައްސާލުމުގެ އަމުރަކަށް އެދިވަޑައިގެންނެވީ ރިޔާސީ އިންތިހާބުގައި ވާދަކުރުމަށް އެމަނިކުފާނަށް އެކަމުގެ ސަބަބުން ހުރަސްތަކެއް އަތުވެދާނެތީ ނަމަވެސް އެ އަމުރު ވެސް ނެރެދިނީ ވަގުތު ފާއިތުވިފަހުންނެވެ.

މީގެ އިތުރުން މައްސަލައިގެ އަޑު އެހުންތައް ނިމި ތިން މަސް ދުވަސް ފާއިތުވެގެން ދިޔައިރުވެސް ހުކުމްގެ މަޖިލިސް ތާވަލްކޮށްފައިނުވެއެވެ.

ހުކުމްކުރުން ލަސްވަމުންދާތީ އެމަނިކުފާނުގެ ވަކީލުންނާ އާއިލާގެ އިތުރުން ސަޕޯޓަރުންވެސް އެ ކޯޓަށް ވަޑައިގެން ލަސްވާ ސަބަބާ މެދު ސުވާލުކޮށްފައިވެއެވެ.

ނަމަވެސް ހައިކޯޓުން ތަކުރާރުކޮށް ދެއްވާ ޖަވާބަކީ އަދި ލަސްނުވާ ކަމަށާ ވި އެންމެ އަވަސްކުރާނެ ކަމަށެވެ.

ކުރިއަށް އޮތީ މަޖިލިސް އިންތިހާބުކަމަށް ވާއިރު ކޮންމެ އިންތިހާބަކާ ދިމާކޮށް އެމަނިކުފާނު ބަންދުގައި މިދިޔަ ސަރުކާރުން ފެށީގެން ބަހައްޓަމުން ގެންދާ ދިއުމުގެ ކަންބޮޑުވުން ވަކީލުން ފާޅުކޮށްފައިވެއެވެ. އަދި މައްސަލަ ނުނިންމާ ދިގު ދަންމަމުން ގެންދަނީ އިންތިހާބަށް ނުފޫޒުފޯރުވުމަށް ކަމަށް ވެސް ހާމަކޮށްފައިވެއެވެ.

މިކަމާ ގުޅިގެން ޗެނަލް13އަށް ދެއްވި އިންޓަވިއުއެއްގައި ޝަމީމު ވިދާޅުވީ، ހައިކޯޓުން ކުރިން ހާމަކޮށްފައިވާ ގޮތުގައި މައްސަލަތައް ބަލަމުން ދަނީ ހުށަހެޅޭ ތަރުތީބުން ކަމުގައިވީ ނަމަވެސް ރައީސް ޔާމީންގެ މައްސަލަ ބަލަން ފެށިއިރުވެސް ހައިކޯޓުގައި އެތައް މައްސަލައެއް ޕާކިންގައި އޮތްކަމަށެވެ.

އެހެންކަމުން ވަކި ތަރުތީބަކުން ދާކަމަށް ގަބޫލުނުކުރެވޭ ކަމަށާ އަދި މައްސަލަ އަވަހަށް ކުރިއަށް ގެންދިޔަ ގޮތަށް މައްސަލައިގެ ހުކުމް ލަސްވާން ޖެހޭ ސަބަބެއް ނުވިސްނޭނެ ކަމަށް ވެސް ޝަމީމު ވިދާޅުވިއެވެ.

ޝަމީމު އިތުރަށް ވިދާޅުވީ ރައީސް ޔާމީންގެ މައްސަލަތައް ފެނިގެން ދަނީ އިންތިހާބުތަކާ ދިމާކޮށް އެމަނިކުފާނާ ދެކޮޅަށް ބޭނުންކުރާ ހަތިޔާރެއްގެ ގޮތުގައި ކަމަށެވެ. އެގޮތުން ރިޔާސީ އިންތިހާބާ ދިމާކޮށް ދަށު ކޯޓު މަރުހަލާގައި އޮތް ަމއްސަލަ ވަރަސް ބާރަށް ގެންދިޔަ ނަމަވެސް ފަހުން އެ މައްސަލައިގެ ހިލަމެއް ނެތް އިރު އޭރު ހައިކޯޓުގައި މައްސަލަ ލަސްކުރަމުން ދިޔަ ކަން ވެސް ޝަމީމު ފާހަގަކުރެއެްވިއެވެ.

ޝަމީމު މިފަދައިން ވިދާޅުވެފައިވާއިރު ރައީސް ޔާމީންގެ މައްސަލަ ނިމި ހުކުމްނުކޮށް ވަނީ ތިން މަހަށްވުރެ ގިނަ ދުވަސް ފާއިތުކޮށްފައެވެ.

ގިނަ ބަޔަކު ގަބޫލުކުރާ ގޮތުގައި މިހާރު ރައީސް ޔާމީންގެ މައްސަލަ ލަސްކުރަމުން ދަނީ އެމަނިކުފާނު ގެންނެވި ސަރުކާރާ އެމަނިކުފާނާ ދެމެދު އުފެދިފައިވާ ނުތަނަވަސްކަމެއްގެ ތެރެއިން ސަރުކާރުގެ އިސް ބޭފުޅުންގެ ނުފޫޒުންނެވެ.