ޕީޕަލްސް ނެޝަނަލް ފްރޮންޓް (ޕީއެންއެފް) އުފެއްދުމަށް ހުށަހެޅި ފޯމުތަކުގެ ތެރެއިން ބާތިލްވި ފޯމުތައް އިސްލާހުކުރުމަށް ފަހު ވަރަށް އަވަހަށް ހުށަހަޅާނެ ކަމަށް ޕާޓީ އުފެއްދުމުގައި އިސްކޮށް އުޅުއްވާ މުހައްމަދު މަލީހު ޖަމާލް ވިދާޅުވެއްޖެއެވެ.

ޕާޓީގެ ފަރާތުން ޗެނަލް13 އަށް މައުލޫމާތު ދެމުން، ޕާޓި އުފެއްދުމުގައި އިސްކޮށް ހަރަކާތްތެރިވާ މުހައްމަދު މަލީހް ޖަމާލް ވިދާޅުވީ 3000 އަށް ވުރެ ގިނަ ފޯމު ހުށަހެޅި އިރު ބައެއް ފޮމުތަކުގައި އިދާރީ މައްސަލަތައް ހުރި ނަމަވެސް ބާތިލު ފޯމެއް ނެތް ކަމަށެވެ. އަދި މައްސަލަ ހުރި ފޯމުތަކުގެ މައްސަލަތައް ހައްލުކުރުމަށް ފަހު އަލުން ފޯމުތައް ހުށަހެޅުމުގެ މަސައްކަތް ކުރަމުން އަންނަ ކަމަށްވެސް މަލީހު ވިދާޅުވިއެވެ.

މަލީހު އިތުރަށް ވިދާޅުވީ، ފޯމު ފުރާ މީހާގެ މަންމަގެ ނަމާއި މަންމަގެ އައިޑީކާޑު ނަމްބަރ ޖަހަން ޖެހޭ ގޮތަށް އޮތުމަކީ އޮންނަން ޖެހޭ ގޮތް ކަމަށް ގަބޫލު ނުކުރެވޭ ކަމަށާ އޭގެ ސަބަބުން ގިނަ ދަތިތައް ކުރިމަތިވާ ކަމަށެވެ.

އެގޮތުން މަންމަ ނިޔާވެފައިވާ މީހުންގެ ފޯމުގައި މަންމަގެ އައިޑީކާޑު ނަންބަރު ޖަހަން ނުޖެހުނު ނަމަވެސް، އުމުރުން 70އަށްވުރެ މަތީ މީހުންގެ މަންމަގެ ނަން ހޯދުމަކީވެސް ބައެއް ފަހަރު އުނދަގޫކަމެއް ކަމަށް މަލީހު ވިދާޅުވިއެވެ.

ޕީއެންއެފްއަކީ ރައީސް އަބްދުﷲ ޔާމީން އިސްވެ ހުންނަވާ އަލަށް އުފައްދަވަން މަސައްކަތްޕުޅު ކުރައްވާ ޕާޓީއެކެވެ.

ޕާޓީ އުފެއްދުމުގެ ހުއްދަ އިލެކްޝަންސް ކޮމިޝަނުން ދީފައިވަނީ 2023 ނޮވެމްބަރ 29 ވަނަ ދުވަހުއެވެ. އެ ޕާޓީގެ މުއައްސިސަކީ ރައީސް ޔާމީނުގެ ދޮށީ ދަރިކަލުން ޒެއިން އަބްދުﷲ ޔާމީންއެވެ.