ކޮންޓްރޯލް ކުރެވިފައިވާ ޝަރުތުތަކެއްގެ ދަށުން ހޮރްމުޒް ކަނޑުއޮޅި އަލުން ހުޅުވާލުމުގެ ބަދަލުގައި، ކަނޑުގެ ސިފައިންގެ ބްލޮކޭޑް އުވާލައި ހަނގުރާމަ މުޅިން ނިމުމަކަށް ގެނައުމަށް އީރާނުން އެއް މަސް ދުވަހުގެ މުއްދަތެއް ކަނޑައަޅައިފިއެވެ.
އެކްސިއޯސް ނިއުސް އިން ރިޕޯޓްކޮށްފައިވާ ގޮތުގައި، އީރާނުން މިހާރު ބޭނުންވަނީ ވަގުތީ ހައްލުތަކެއްގެ ބަދަލުގައި ސަރަހައްދީ ހަމަޖެހުން ގާއިމުކުރުމަށް ދާއިމީ ފިޔަވަޅުތަކެއް އެޅުމަށެވެ. މީގެ ތެރޭގައި ކަނޑުގެ ސިފައިން ކުރިއަށްގެންދާ ބްލޮކޭޑްތައް ހުއްޓާލުމާއި، ހަނގުރާމައިގެ ހަރަކާތްތައް މުޅިން ހުއްޓާލުން ހިމެނެއެވެ.
ނިއުކްލިއާ ޕްރޮގްރާމާ ގުޅޭ މަޝްވަރާތަކާ ގުޅޭގޮތުން އީރާނުން ބުނެފައިވަނީ، އައު މަޝްވަރާތަކެއް ފެށޭނީ ބްލޮކޭޑް އުވާލައި، ދާއިމީ ގޮތެއްގައި ހަނގުރާމަ ހުއްޓާލާނެކަމުގެ ފުރިހަމަ ކަށަވަރުކަން ލިބުމުން ކަމަށެވެ. "ނިއުކްލިއާ މަޝްވަރާތައް ފެށޭނީ ބްލޮކޭޑް އުވާލައި ދާއިމީ ހަނގުރާމަ ހުއްޓާލުމެއް ކަށަވަރުވުމުން" ކަމަށް އެކްސިއޯސްގެ ރިޕޯޓުގައި ބަޔާންކޮށްފައިވެއެވެ.
މި ނިންމުމާއެކު ބައިނަލްއަގުވާމީ މުޖުތަމައުން މިހާރު އިންތިޒާރު ކުރަމުންދަނީ އީރާނުން ދީފައިވާ އެއް މަސް ދުވަހުގެ މުއްދަތުގެ ތެރޭގައި ކަމާބެހޭ ފަރާތްތަކުން އަޅާނެ ފިޔަވަޅުތަކަށެވެ. ހޮރްމުޒް ކަނޑުއޮޅިއަކީ ދުނިޔޭގެ ތެލުގެ ވިޔަފާރީގައި މުހިންމު ދައުރެއް އަދާކުރާ ސަރަހައްދަކަށް ވުމުން، މި ނިންމުމުގެ ސަބަބުން ދުނިޔޭގެ އިގްތިސާދަށް ބޮޑެތި އަސަރުތަކެއް ކުރާނެ ކަމަށް ބެލެވެއެވެ.
