އިސްރާއީލްގެ ސިފައިން، ފަލަސްތީނުގެ ޣައްޒާގައި ހުންނަ އަލް-ޝިފާ ހޮސްޕިޓަލަށް އަރައިގަނެ މުސްލިމުން މަރަން ފަށައިފިއެވެ.

ޝިފާ ހޮސްޕިޓަލްގެ ތެރޭގައި "އޮޕަރޭޝަނެއް" ހިންގަން ފަށާފައިވާ ކަން އިސްރާއީލްގެ އަސްކަރިއްޔާ އިން ވަނީ ކަށަވަރުކޮށްދީފައެވެ. އިސްރާއީލުން ބުނާ ގޮތުގައި ހަމާސް އިން ދަނީ އެ ހޮސްޕިޓަލްގައި ހަރަކާތްތައް ރާވައި ހަމަލާތައް ދިނުމަށް "ކޮމާންޑު" ދެމުންނެވެ.

އިސްރާއީލުން ބުނީ މި އޮޕަރޭޝަންގައި އިންސާނީ އެހީތެރިކަން ވެސް ފޯރުކޮށްދޭނެ ކަމަށެވެ. އެ ގޮތުން ހޮސްޕިޓަލްގައި ތިބި އާންމު ރައްޔިތުންނަށް ކާބޯތަކެއްޗާއި ފެން ފޯރުކޮށްދޭނެ ކަމަށް ބުނެފައިވެއެވެ. ތަރުޖަމާނު ބުނެފައި ވަނީ ހޮސްޕިޓަލްގައި ތިބި ބަލި މީހުންނާއި ސިއްހީ ހިދުމަތްތެރިން އެ ހޮސްޕިޓަލުން ނުކުތުމުގެ ބޭނުމެއް ނެތް ކަމަށާއި އެމީހުންނަށް އެއްވެސް ނުރައްކަލެއް ނޯންނާނެ ކަމަށެވެ.

އެހެންނަމަވެސް، ރިޕޯޓުތައް ބުނާ ގޮތުގައި ފެންނަމުން ދަނީ އިސްރާއީލްގެ ބަހާއި އަމަލާ ދިމާ ނުވާ މަންޒަރެވެ.

އިސްރާއީލްގެ ހަމަލާތަކުގެ ސަބަބުން ހޮސްޕިޓަލްގެ ތެރޭގައި ތިބި އެތައް ބަޔަކު މިހާރު ވެސް އެ ތަނުން ނުކުމެގެން ގޮސްފައިވާ ކަމަށް ރިޕޯޓުތައް ބުނެއެވެ.

އެގޮތުން މިހާތަނަށް އައިއިރު ވެސް ޝިފާ ހޮސްޕިޓަލްގެ ތެރޭގައި ތިބި ބައެއް މީހުން ޝަހީދުކޮށްލައި ގިނަ ބަޔަކު ޒަހަމްކޮށްލާފައިވާ ކަމުގެ ރިޕޯޓުތައް ދަނީ ލިބެމުންނެވެ.

އިސްރާއީލުން ޝިފާ ހޮސްޕިޓަލްގެ ސާޖިކަލް އިމާރާތަށް ހަމަލާ ދިނުމުގެ ސަބަބުން އެ އިމާރާތުގެ ބައެއްގައި ވަނީ އަލިފާން ރޯވެފައެވެ.

އަދި ހޮސްޕިޓަލްގައި ތިބި މީހުން ނުކުތުމަށް އިސްރާއީލްގެ ސަލާމަތީ ބާރުތަކުން އަންނަނީ ލައުޑް ސްޕީކަރުތައް ބޭނުންކޮށްގެން ގޮވަމުންނެވެ.

ޣައްޒާގެ ހެލްތު މިނިސްޓްރީން ވަނީ އިސްރާއީލުން ހިންގަމުންދާ ގަތުލު އާންމު ހުއްޓާލުމަށް ބައިނަލްއަގުވާމީ ޖަމިއްޔާތަކުން މަސައްކަތްކޮށް ދިނުމަށް ގޮވާލައިފައެވެ.