ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) އިން އެބޯލާ ވައިރަސް ފެތުރުމާ ގުޅިގެން ބައިނަލްއަގުވާމީ ސިއްހީ ކުއްލި ނުރައްކަލުގެ ހާލަތު އިއުލާންކުރުމާ ގުޅިގެން، ސްރީލަންކާގެ ސިއްހީ ދާއިރާތަކުން ރައްކާތެރިކަމުގެ ހަރުކަށި ފިޔަވަޅުތަކެއް އަޅަން ފަށައިފިއެވެ. ލަންކާގެ ހެލްތު މިނިސްޓްރީން ވަނީ ގައުމުގެ ހުރިހާ ބޯޑަރުތަކެއްގައި ފާރަވެރިވުން ވަރުގަދަކޮށްފައެވެ.
ސްރީލަންކާގެ އެޕިޑެމިއޮލޮޖީ ޔުނިޓުން ހާމަކޮށްފައިވާ ގޮތުގައި، ހާއްސަކޮށް އެފްރިކާގެ ގައުމުތަކުން ދަތުރުކުރާ ފަސިންޖަރުން ބަލައި ފާސްކުރުމުގެ ކަންކަން މިހާރު ވަނީ ކުރިއަށްވުރެ ހަރުދަނާކޮށްފައެވެ. ބައިނަލްއަގުވާމީ އެއާޕޯޓުތަކުގައި ހުންނަ ހެލްތު ޕޯސްޓުތަކާއި އިމިގްރޭޝަން އޮފިޝަލުންނަށް ބަލީގެ އަލާމާތްތައް ދެނެގަންނާނެ ގޮތުގެ ހާއްސަ ތަމްރީނާއި އިރުޝާދު މިހާރު ވަނީ ދީފައެވެ.
ބަލި ޖެހިފައިވާ ކަމަށް ޝައްކުކުރެވޭ މީހަކު ފެނިއްޖެ ހާލަތެއްގައި އަމަލުކުރާނެ ހާއްސަ ޕްރޮޓޮކޯލްތަކެއް އެކުލަވާލާފައިވާއިރު، ގައުމުގެ ހޮސްޕިޓަލްތަކުގައި ކަރަންޓީނު ކުރެވޭނެ އިންތިޒާމުތައް ވެސް ދަނީ ހަމަޖައްސަމުންނެވެ.
"މި ބަލި ގައުމަށް އެތެރެވިޔަނުދިނުމަށް ކުރެވެން ހުރި ހުރިހާ މަސައްކަތެއް ދަނީ ކުރަމުން،" ހެލްތު މިނިސްޓްރީގެ އޮފިޝަލަކު ވިދާޅުވިއެވެ.
ކަމާބެހޭ މާހިރުން ވިދާޅުވާ ގޮތުގައި ސްރީލަންކާއަށް މި ބަލީގެ ނުރައްކާ އޮތް މިންވަރު މިވަގުތު ކުޑަ ނަމަވެސް، ބައިނަލްއަގުވާމީ ދަތުރުފަތުރުގެ ސަބަބުން ބަލި ފެތުރުމުގެ ފުރުސަތު އޮތުމާއެކު، ދުރާލާ ރައްކާތެރިކަމުގެ ފިޔަވަޅު އެޅުމަކީ ގައުމުގެ ސަލާމަތަށް ކޮންމެހެން މުހިންމު ކަމެކެވެ.
