ރައިސް އަބްދުﷲ ޔާމީންގެ މައްޗަށް، ރިޔާސި އިންތިހާބާ ދިމާކޮށް އަވަސް އަރުވާލައިގެން އިއްވީ ހުކުމްގެ އިސްތިއުނާފުގެ އަޑު އެހުންތައް 119 ދުވަސް ފާއިތުވެފައިވާއިރުވެސް އަދިވެސް ހުކުމްގެ މަޖިލިސް ތާވަލްކޮށްފައި ނުވާކަން ހާމަވެއްޖެއެވެ.

ވ.އާރަށް ކުއްޔަށް ދޫކުރުމުގެ މުއާމަލަތާ ގުޅުވާ ރައީސް ޔާމީން ފްރޭމުކޮށް އުފުލި ދައުވާ ސާބިތުވާ ކަމަށް ކަނޑައަޅާ ކުރިމިނަލު ކޯޓުން 2022 ވަނަ އަހަރުގެ ޑިސެމްބަރު މަހުގެ 25 ވަނަ ދުވަހު އިއްވި ހުކުމްގެ އިސްތިއުނާފުގެ މައްސަލަ ރައީސް ޔާމީންގެ ފަރާތްޕުޅުން ހުށަހެޅީ 2023 ވަނަ އަހަރުގެ އެޕްރިލު މަހުގެ ތެރޭގައެވެ. އޭގެ ފަހުން އިސްތިއުނާފު މަރުހަލާ ވެސް ދިގު ދަންނަމުން ގޮސް ނިންމާލާފައިވަނި 2023 ވަނަ އަހަރުގެ ނޮވެމްބަރު މަހުގެ 21 ވަނަ ދުވަހުއެވެ.

އެ ދުވަހު ރިޔާސަތުން އަޑު އެހުން ނިންމާ ލެއްވީ ދެން އިތުރުކަމެއް ސާފުކުރަން ނެތް ނަމަ އޮންނާނީ ހުކުމު ކުރުމުގެ މަޖިލިސް ކަމަށް އިއުލާންކުރުމަށް ފަހުއެވެ. ނަމަވެސް އޭގެ ފަހުން 119 ދުވަސް ފާއިތުވެގެން ގޮސްފައިވާއިރު އަދިވެސް ހުކުމުގެ މަޖިލިސް ތާވަލްކުރާނެ ދުވަހެއް ނޭނގެއެވެ.

އެންމެ ފަހުންވެސް މައްސަލައިގެ ހުކުމު އިއްވުމުގެ އަދާހަމައެއް ހޯދާލަން ހައިކޯޓަށް ޗެނަލް13 އިން ގުޅާލުމުން މީޑިޔާ އޮފިސަރ ވިދާޅުވީ އަދި އެއްވެސް އަދާ ހަމައެއް ނެތް ކަމަށެވެ.

ރައީސް ޔާމީންގެ އިސްތިއުނާފީ މައްސަލަ ތާވަލްނުކޮށް ލަސްކުރަމުންދާތީ އެމަނިކުފާނުގެ ވަކީލުންގެ ޓީމުން ވެސް ވަނީ ކަންބޮޑުވުން ފާޅުކުރައްވާފައެވެ.

އެގޮތުން ރައީސް ޔާމީންގެ އިސް ޤާނޫނީ ވަކީލު މުހައްމަދު ޖަމީލް އަހުމަދު ވިދާޅުވެފައިވަނީ ރައީސް ޔާމީނުގެ އިސްތިއުނާފު ލަސްކުރަނީ ކޮންމެ އިންތިޚާބަކާއި ދިމާކޮށް ނުފޫޒުން ކަމަށެވެ.

ގިނަ ބަޔަކު ގަބޫލުކުރާ ގޮތުގައި މިހާރު ރައީސް ޔާމީންގެ މައްސަލަ ލަސްކުރަމުން ދަނީ އެމަނިކުފާނު ގެންނެވި ސަރުކާރާ އެމަނިކުފާނާ ދެމެދު އުފެދިފައިވާ ނުތަނަވަސްކަމެއްގެ ތެރެއިން ސަރުކާރުގެ އިސް ބޭފުޅުންގެ ނުފޫޒުންނެވެ.