ދުނިޔޭގެ އެކި ކަންކޮޅުތަކުގައި ތިބި މުސްލިމުންނަށް އަމާޒުކޮށްގެން، މަސްޖިދުއް ނަބަވީ އިން ކުރިއަށް ގެންދާ ޤުރުއާން ހިތުދަސްކުރުމާއި އިސްލާމީ ކިޔެވުމުގެ އާ ޕްރޮގްރާމްގައި ބައިވެރިވުމުގެ ފުރުސަތު ރަސްމީކޮށް ހުޅުވާލައިފިއެވެ.
އަންހެނުންނާއި ފިރިހެނުންނަށް ވަކިން ކުރިއަށް ގެންދާ މި ޕްރޮގްރާމަކީ މުސްލިމުންނާއި ކީރިތި ޤުރުއާނާ އޮތް ގުޅުން ބަދަހިކޮށް، އިސްލާމީ ތައުލީމު ދުނިޔޭގެ ކޮންމެ ތަނެއްގައި ހުރެގެންވެސް އުނގެނުމުގެ މަގު ފަހިކޮށްދިނުމުގެ މަގުސަދުގައި ފެށި މަޝްރޫއެކެވެ. މި ޕްރޮގްރާމްގެ ދަށުން ދަރިވަރުންނަށް މަސްޖިދުއް ނަބަވީއަށް ހާޒިރުވެގެން ނުވަތަ ގޭގައި ތިބެގެން އޮންލައިންކޮށް ކްލާސްތަކުގައި ބައިވެރިވުމުގެ އިޚްތިޔާރު ލިބިގެންވެއެވެ.
ހިޖުރައިން 1448 ވަނަ އަހަރުގެ މުޙައްރަމް މަހުން ފެށިގެން ސަފަރު މަހުގެ ނިޔަލަށް ކުރިއަށްދާ މި ޕްރޮގްރާމްގައި ކިޔަވައިދެއްވާނީ ފެންވަރު ރަނގަޅު ގާބިލް މުދައްރިސުންނެވެ. ޚާއްޞަ ކަރިކިއުލަމެއްގެ ދަށުން ކުރިއަށްދާ މި ކޯހުގައި ޤުރުއާން ހިތުދަސްކުރުމާއި، މުރާޖަޢާކުރުމާއި، ތަޖުވީދު މަގުން ކިޔެވުމުގެ އިތުރުން ހޮވާލެވޭ އިސްލާމީ ލިޔުންތައް އުނގަންނައިދިނުމަށް ވަނީ ހަމަޖެހިފައެވެ.
ކްލާސްތައް ހެނދުނާއި މެންދުރުގެ ސެޝަންތަކަށް ބަހާލެވިފައިވާއިރު، ބައިވެރިންނަށް އެމީހަކު ބޭނުންވާ ވަގުތެއް އިޚްތިޔާރު ކުރުމުގެ ފުރުސަތު އޮންނާނެއެވެ. ތަފާތު އުމުރުފުރާތަކަށް ހުޅުވާލާފައިވާ މި ޕްރޮގްރާމް ކާމިޔާބުކަމާއެކު ނިންމާލާ ދަރިވަރުންނަށް ރަސްމީ ސެޓްފިކެޓް ދިނުމަށް ވަނީ ނިންމާފައެވެ.
މި ޕްރޮގްރާމަކީ ޒަމާނީ ޓެކްނޮލޮޖީގެ އެހީގައި އިސްލާމީ ތައުލީމު ފެތުރުމަށް ކުރެވޭ މުހިންމު މަސައްކަތެއްގެ ގޮތުގައި ފާހަގަކުރެވެއެވެ. މިކަމުގެ ސަބަބުން ދުނިޔޭގެ އެކި ހިސާބުތަކުގައި ތިބި އެތައް ހާސް މުސްލިމުންނަށް، އިސްލާމްދީނުގެ އެންމެ މާތް އެއް ބިމާ ރޫޙާނީ ގޮތުން ގުޅިލާމެހިގެން އުނގެނުމުގެ ފުރުސަތު ފަހިވެގެންދާނެއެވެ.
