އިސްރާއީލުގެ ރަހުމުކުޑަ އިސްތިއުމާރުގެ ދަށުގައި، ޖަލުގެ އަނދިރި ގޮޅިތަކުގައި އޭނާގެ ޒުވާންކަމާއި މުޅި އުމުރު ގުރުބާންކުރި ފަލަސްތީނުގެ ދަރިއަކު، މިނިވަންކަމުގެ ފޮނި މީރުކަން ދެކުމުގެ ނަސީބު ނުލިބި އިސްރާއީލުގެ ބެލުމުގެ ދަށުގައި ހުއްޓާ ޝަހީދުވެއްޖެއެވެ.
25 އަހަރު ޖަލުގެ ތޭރިތަކުގެ ފަހަތުގައި ހޭދަކުރި އުމުރުން 47 އަހަރުގެ އިމާދު ރާޖިހް ސަރްހާން ޝަހީދުވީ، ގިލްބޯއާ ޖަލުގައި ހުއްޓާ ދިމާވި ސިއްހީ ކުއްލި ނުރައްކަލުގެ ހާލަތެއްގައެވެ. ފަލަސްތީނުގެ އޮފިޝަލުންނާއި އިންސާނީ ހައްގުތަކަށް ވަކާލާތުކުރާ ފަރާތްތަކުން ތުހުމަތުކުރާ ގޮތުގައި، މިއީ އިސްރާއީލުން ފަލަސްތީނުގެ ގައިދީންނާ މެދު ގެންގުޅޭ އިހުމާލުގެ ސިޔާސަތުގެ ސަބަބުން ހިނގި ހިތާމަވެރި ހާދިސާއެކެވެ.
ސަރްހާންގެ މި ވަކިވުމާއެކު ފަލަސްތީނުގެ ރައްޔިތުންގެ މެދުގައި ވަނީ ބަޔާންކުރަން ދަތި ހިތާމައާއި، އިސްރާއީލުގެ އަނިޔާވެރިކަމާ މެދު އިންތިހާ ދަރަޖައިގެ ރުޅިވެރިކަން އުފެދިފައެވެ. މިއީ ހަމައެކަނި ފުރާނައެއް ގެއްލުމެއް ނޫނެވެ. މިއީ އެތައް އަހަރެއްގެ އިންތިޒާރާއި، ދުވަހަކުވެސް ފުރިހަމަނުވި އާއިލީ ބައްދަލުވުންތަކުގެ ހިތްދަތި ނިމުމެވެ. އޭނާގެ އާއިލާއިން އުއްމީދުކޮށްގެން ތިބީ ކޮންމެވެސް ދުވަހަކުން ސަރްހާން މިނިވަންވެ، ގޭގެ ދޮރުން އެތެރެވާނެ ހިނދުކޮޅަކަށެވެ. ނަމަވެސް އިސްރާއީލުގެ އަނިޔާވެރިކަން އެ ފުރުސަތެއް ނުދިނެވެ.
ފަލަސްތީނުގެ ކޮމިޝަން އޮފް ޑިޓެއިންސް އެފެއާޒް އާއި ފަލަސްތީނުގެ ޕްރިޒަނަރ ސޮސައިޓީން ބުނެފައިވަނީ، ސަރްހާންގެ މަރަކީ އިސްރާއީލުގެ ޖަލުތަކުގައި ފަލަސްތީނު މީހުން އުފުލަމުންދާ ވޭނުގެ ބޮޑުކަން ހާމަކޮށްދޭ އަނެއް ހެއްކެވެ. އެކަށީގެންވާ ސިއްހީ ފަރުވާ ނުދިނުމާއި، އިންސާނިއްޔަތާ ޚިލާފު އިހާނެތި ދަށު ދަރަޖައިގެ އަމަލުތަކަކީ އެ ޖަލުތަކުގެ އާންމު ހާލަތެވެ.
ފަލަސްތީނުގެ އެކި ޖަމާއަތްތަކުން ވަނީ ސަރްހާންގެ ގައުމީ ޚިދުމަތާއި ކެތްތެރިކަމަށް ސަލާމް ފޮނުވާފައެވެ. ސަޕޯޓަރުން އޭނާ ހަނދާންކުރަނީ، އަމިއްލަ މިނިވަންކަމަށްވުރެ ގައުމުގެ ހައްގުގައި ޖަލުގެ ހަތަރު ފާރުގެ އެތެރޭގައި މުޅި އުމުރު ދުއްވާލި ބަތަލެއްގެ ގޮތުގައެވެ.
މި ހާދިސާއާ ގުޅިގެން، ބައިނަލްއަގުވާމީ މުޖުތަމައުން އިސްރާއީލުގެ ޖަލުތަކުގެ ހާލަތު ބަލައި، މިފަދަ މަރުތަކުގެ މިނިވަން ތަހުގީގެއް ހިންގުމަށް ގޮވާލާ ގޮވާލުންތައް ދަނީ އިތުރުވަމުންނެވެ. ސަރްހާންގެ މަރަކީ މުޅި ފަލަސްތީނަށް ލިބުނު ފުން ހިތާމައެއްގެ އިތުރުން، ޒަމާންތަކެއް ވަންދެން ހިނގަމުންދާ އިސްތިއުމާރީ އަނިޔާވެރިކަމުގެ ރަމްޒެކެވެ.
