އެމްޑީޕީ ޗެއަރޕާސަން އިންތިހާބުގައި ކުރީގެ ރައީސް މުހައްމަދު ނަޝީދުއާ ދެކޮޅަށް ވެރިކަން ކުރާ ޕާޓީ ޕީއެންސީއިން ކެމްޕެއިން ކުރިކަމަށް އެ ޕާޓީއިން އިއުތިރާފްވެއްޖެއެވެ.
އެ ޕާޓީގެ ފަރާތުން މިކަމަށް އިއުތިރާފުވެފައިވަނީ، ޕީއެންސީގެ ޕީޖީ ލީޑަރު އިބްރާހިމު ފަލާހުއެވެ.
މަޖިލީހުގައި އަންގާރަ ދުވަހު ބަހުސްކުރި، ސިނގިރޭޓު ޑިއުޓީ 4ރ.އަށް ކުޑަކުރަން ޖެހޭ ގޮތަށް އިމްޕޯޓް އެކްސްޕޯޓް ގާނޫނަށް އިސްލާހު ގެންނަން ސަރުކާރުގެ ފަރާތުން ހުށަހެޅި ބިލުގެ ބަހުސްގައި ވާހަކަ ދައްކަވަމުން، ފަލާހު ވަނީ، އެމްޑީޕީގެ ޗެއާޕާސަން އިންތިހާބުގައި ގަލޮޅު ދެކުނު ދާއިރާގެ މަޖިލިސް މެންބަރު މީކާއިލް އަހުމަދު ނަސީމަށް ފަހު ވަގުތު ވޯޓު ހޯދައިދޭން ޖެހުނީ ޕީއެންސީގެ މެމްބަރުންނަށް ކަމަށް ވިދާޅުވެފައެވެ.
އެގޮތުން މަޖިލީހުގައި ތިއްބަވާ އެމްޑީޕީގެ 11 މެމްބަރަކު މީކާއިލަށް ވޯޓު ހޯދައިދޭނެކަމަށް ވައުދުވުމަށް ފަހު ލަނޑުދެއްވީ ކަމަށާ އެހެންވެ ވޯޓު ހޯދައިދޭން ފަހު ވަގުތު ޕީއެންސީގެ މެމްބަރުންގެ ގާތުގައި މީކާއިލް އެދިވަޑައިގެންނެވި ކަމަށް ފަލާހު ވަނީ ވިދާޅުވެފައެވެ. މީކާއިލްގެ އެ އެދުމަށް ޕީއެންސީއަށް ވީވަރެއް ކޮށްދިން ކަމަށްވެސް ފަލާހު ވަނީ އިއުތިރާފުވެފައެވެ.
ފަލާހު މިފަދައިން ވިދާޅުވެފައިވާއިރު، ރައީސް ނަޝީދު ވަނީ އިންތިހާބުގެ ތެރޭގައި، ޕީއެންސީއިން އެމަނިކުފާނާ ދެކޮޅަށް ކެމްޕެއިންކުރާކަމުގެ ވާހަކަ އެތައް ފަހަރަކު ސަމާލުކަމަށް ގެނެސްފައިކަން ފާހަގަކޮށްލެވެއެވެ.
