ހޮރުމޫޒު ކަނޑުއޮޅިން ދަތުރުކުރި މުދާ އުފުލާ ބޯޓަކަށް އީރާނުން ހަމަލާދިން ކަމަށް ބުނެ، އެމެރިކާއިން އީރާނުގެ އަސްކަރީ މަރުކަޒުތަކަށް ވަރުގަދަ ވައިގެ ހަމަލާތަކެއް ދީފިއެވެ.
މިއީ ޖޫން މަހުގެ 17 ވަނަ ދުވަހު ދެ ގައުމުގެ ދެމެދުގައި ގާއިމުކުރި "ސުލްހައިގެ އެއްބަސްވުމަށް" ފަހު، އެމެރިކާއިން އީރާނަށް މިފަދަ ހަމަލާއެއް ދިން މިއީ ފުރަތަމަ ފަހަރެވެ.
އެމެރިކާގެ ސެންޓްރަލް ކޮމާންޑުން ހާމަކުރި ގޮތުގައި ހުކުރު ދުވަހު ދިން މި ހަމަލާތައް އަމާޒުކޮށްފައިވަނީ އީރާނުގެ މިސައިލާއި ޑްރޯން ރައްކާކުރާ މަރުކަޒުތަކުގެ އިތުރުން، އައްސޭރިފަށުގައި ހުރި ރާޑަރު ސިސްޓަމްތަކަށެވެ. މި ހަމަލާތަކަކީ ބުރާސްފަތި ދުވަހު "އެވަރ ލަވްލީ" ނަމަކަށް ކިޔާ މުދާ އުފުލާ ބޯޓަކަށް އީރާނުން ދިން ޑްރޯން ހަމަލާގެ ރައްދުގައި ދިން ހަމަލާތަކެއް ކަމަށް އެމެރިކާއިން ބުނެއެވެ.
އެމެރިކާގެ ރައީސް ޑޮނަލްޑް ޓްރަމްޕް މިކަމާ ގުޅިގެން ވިދާޅުވީ، އީރާނުން ބޯޓަށް ހަމަލާދީފައިވަނީ ދެގައުމުގެ ދެމެދުގައިވާ ހަނގުރާމަ ހުއްޓާލުމުގެ އެއްބަސްވުމާ ކަނޑައެޅިގެން ހިލާފަށް ކަމަށެވެ. އަދި އެއީ ބުއްދިވެރި ނޫން އަމަލެއްގެ ގޮތުގައި އޭނާ ސިފަކުރެއްވިއެވެ. އެމެރިކާގެ ނައިބު ރައީސް ޖޭޑީ ވެންސް އިތުރުކުރެއްވި ގޮތުގައި، އެއްބަސްވުމާ މެދު އީރާނުގެ ޝަކުވާއެއް އޮތް ނަމަ މަޝްވަރާ ކުރެވޭނެ ކަމަށާއި، ނަމަވެސް އަނިޔާވެރިކަމަށް ރައްދު ދޭނީ އަނިޔާވެރިކަމުން ކަމަށެވެ.
ނަމަވެސް އީރާނުން މި ތުހުމަތުތައް ދޮގުކުރެއެވެ. އީރާނުން ބުނާ ގޮތުގައި އެ ބޯޓަށް ހަމަލާދޭން ޖެހުނީ ހުއްދަ ނޫން މަގަކުން ދަތުރުކުރަމުން ދިއުމުންނެވެ. އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ވަނީ އެމެރިކާއަކީ އެއްބަސްވުންތަކާ ހިލާފުވާ ބައެއްގެ ގޮތުގައި ސިފަކޮށްފައެވެ. ރައްދު ދިނުމުގެ ގޮތުން އީރާނުގެ ކަނޑުގެ ސިފައިން ވަނީ އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދީ، އެމެރިކާއިން މިފަދަ ކަމެއް ތަކުރާރުކޮށްފިނަމަ ދެން ދޭ ރައްދު މިއަށްވުރެ ވަރުގަދަވާނެ ކަމުގެ އިންޒާރު ދީފައެވެ.
އީރާނުގެ ގާނޫނު މަޖިލީހުގެ ގައުމީ ސަލާމަތާ ބެހޭ ކޮމިޝަނުގެ ރައީސް އިބްރާހީމް އަޒީޒީ ވިދާޅުވީ، މަޝްވަރާތައް ކުރިއަށްދަނިކޮށް އެމެރިކާއިން ހަމަލާދިނުމަކީ އެ ގައުމުން އަބަދުވެސް ކުރާ ކަމެއް ކަމަށާއި، މީގެ ސަބަބުން އެމެރިކާއަށް ލިބޭނީ ލަދުވެތިކަމާއި ހިތާމަ ކަމަށެވެ.
މިދިޔަ ޖޫން މަހުގެ އެއްބަސްވުމުގައި 60 ދުވަހުގެ މުއްދަތަށް އެއްވެސް ފީއަކާ ނުލައި އުޅަނދުފަހަރަށް ދަތުރުކުރެވޭނެ މަގު ފަހިކޮށްދިނުމަށް އީރާނުން އެއްބަސްވި ނަމަވެސް، އީރާނުން މިހާރު އުޅަނދުފަހަރުގެ އަތުން ފީ ނަގަމުންދާ ކަމަށް އެމެރިކާއިން ތުހުމަތުކުރެއެވެ. ނަމަވެސް ބޯޓުގެ ވެރިފަރާތް ކަމަށްވާ އެވަރގްރީން ކުންފުނިން ބުނަނީ ބޯޓު ދަތުރުކުރީ ކަނޑައެޅިފައިވާ ރައްކާތެރި މަގުން ކަމަށެވެ.
