ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ ވެރިކަމުގައި 2023 ވަނަ އަހަރުގެ ކުރީ ކޮޅުގައި ތިލަފުށިން ބިދޭސީ ވިޔަފާރިތަކަށް 99 އަހަރަށް ބިން ދޫކުރަން ނިންމައި އިއުލާނުކުރުމުން އެކަމާމެދު އެންމެ ބޮޑަށް ކަންބޮޑުވެވަޑައިގަތީ މިހާރު ސަރުކާރުގެ އިސް މަޤާމުތަކުގައި ތިއްބެވި ބޭފުޅުންނެވެ.

ބައެއް ބޭފުޅުން ޓުވީޓުތައް ކުރެއްވިއެވެ. އެވަރުން ނުވެގެން އެ ބޭފުޅުންގެ ލީޑާޝިޕުގައި ހިންގަމުން އައި އެއިރުގެ އިދިކޮޅު ޕީޕީއެމް/ޕީއެންސީން ބަޔާންތައްވެސް ނެރުނެވެ. ޚިޔާނާތާއި ޣަދަރުވެރިކަމުގެ ތުހުމަތު އެއިރުގެ ސަރުކާރަށް އަމާޒުކުރެއްވިއެވެ. ޤައުމުގެ ކުރިމަގު ވިއްކަވައިލެއްވި ކަމުގެ ތުހުމަތު ރައީސް ޞާލިޙަށް ކުރެއްވިއެވެ.

އެންމެ ބޮޑަށް އެ މައްސަލާގައި އެއިރުގެ ސަރުކާރަށް ފާޑުވިދާޅުވީ މިހާރު އިޤުތިޞާދީ ވަޒީރުކަމުގައި ހުންނެވި މެންބަރު މުހައްމަދު ސައީދެވެ. ސައީދު ވިދާޅުވި ގޮތުގައި ބުރިޖަކުން މާލެއާ ގުޅުވައިލާ ތިލަފުއްޓަކީ މާލޭގެ ބިމުން ބައެއް، އަދި އެ ބިމަކީ ދައުލަތުގެ ބިމެއްކަމަށާއި ރައްޔިތުންގެ މުދަލެކެވެ.

ސައީދު އިތުރަށް ވިދާޅުވީ ތިލަފުށީގެ އަގުހުރި ބިންތައް ބޭރުގެ ވިޔަފާރިވެރިންނަށް ވިއްކަން ހުޅުވައިލުމަކީ ކަޑަޖަހާފައި ދިވެހި ވިޔަފާރިވެރިންގެ ކުރިމަގު ނުއަގުގައި ވިއްކުން ކަމަށެވެ. އަދި އެކަން ސައީދު ސިފަކުރެއްވީ ބޮޑު ވައްކަމެއް ކަމަށެވެ.

މިއަދު ސައީދު ހުންނެވީ ޤައުމުގެ އިޤުތިޞާދީ ސިޔާސަތު ހިންގަވާ ވަޒީރުގެ މަޤާމުގައެވެ. ރައީސް މުޢިއްޒު ނިންމަވައި ރައީސް އޮފީހުގެ ޕޮލިސީ އޮފީހުން އަންގައިގެން، ސައީދާއެކު މަޖިލީހުގައި މިކަންކަމަށް ފާޑުވިދާޅުވާން އެއިރު ހުންނެވި މިހާރުގެ އެޗްޑީސީގެ އެމްޑީ ފަޒުލް ރަޝީދު ތަންފީޒުކުރައްވައިގެން އެއޮށް ތިލަފުށިން ބިން ބިދޭސީންނަށް ވިއްކަން ހުޅުވީއެވެ. އެއިރު ދެއްކެވި އެއްވެސް ވާހަކަފުޅެއް ސައީދު ހަނދުމަފުޅު ހުރިކަމަށް ނުފެނެއެވެ.

ފާއިތުވި އަހަރުގެ ފެބްރުއަރީ 9 ވަނަ ދުވަހުގައި އިދިކޮޅު ޕީޕީއެމް/ޕީއެންސީ އިއްތިހާދުން ދިގު ބޮޑު ބަޔާނެއްވެސް ނެރުނެވެ. އެ ބަޔާނުގައި ބުނެފައިވަނީ އެ ސަރަހައްދުގައި ޤާއިމުކުރަން ނިންމާފައިވާ ބައިނަލްއަޤުވާމީ ވިޔަފާރި ބަނދަރާއި އެނޫންވެސް މުހިއްމު އިޤުތިޞާދީ ވަސީލަތްތައް ޤާއިމުކުރުމުގެ ކުރިން، ބޭރުގެ ވިޔަފާރިތަކަށް 99 އަހަރަށް ބިން ދޫކުރުމަކީ އެފަރާތްތަކަށް ނާޖާއިޒު މަންފާއާއި ދިވެހި ވިޔަފާރިތަކާ ވާދަކުރުމުގައި ބޮޑު އެޑްވާންޓޭޖެއް ދިނުން ކަމަށެވެ.

އެވަރުން ފުއްދައިލީއެއް ނޫނެވެ. އެ އިއްތިހާދެއްގެ ނައިބު ލީޑަރެއްގެ ގޮތުގައި މިހާރުގެ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ހުންނެވި އިއްތިހާދުގެ ބަޔާނުގައި ބުނެފައިވަނީ، އެ ބިންތައް ބިދޭސީ ފަރާތްތަކަށް ދޫކުރުމަކީ މުސްތަޤުބަލުގައި ދެމިގެންދަނިވި ގޮތަކަށް ރާއްޖޭގެ އިޤުތިޞާދީ ކުރިއެރުމަށް ނޭދެވޭ އަސަރުކުރާނެ ކަމެއް ކަމަށެވެ.

ބަޔާނެއް ނެރެފައި ފުއްދައިލީ އެކަންޏެއްވެސް ނޫނެވެ. އެއިރު މަޑުއްވަރީ ދާއިރާގެ މަޖިލިސް މެންބަރުކަމުގައި ހުންނެވި މިހާރު ސަރުކާރުގެ ބާރުގަދަ ވަޒީރު އާދަމް ޝަރީފު ކުއްލި މައްސަލައެއްވެސް މަޖިލީހަށް ހުށަހެޅުއްވިއެވެ. އެ ކުއްލި މައްސަލާގައި ބުނެފައިވަނީ ކުދި އަދި މެދުފަންތީގެ ވިޔަފާރިތަކާ ބިދޭސީންނާ ވާދަކުރަންޖެހޭ އުސޫލެއްގެ ތެރެއިން ރާއްޖޭގެ އަގުބޮޑު ބިން ގަނެވޭނެ ގޮތެއް ހެދުމުން ދިވެހި ވިޔަފާރިތަކަށް ފުރުސަތު ހަނިވާނެ ކަމަށެވެ.

އިތުރަށް އެ މައްސަލާގައި އާދަމް ޝަރީފު ވިދާޅުވީ އެ ބިންތައް އެފަދައިން ދޫކޮށްލުމުން ދިވެހި ވިޔަފާރިތައް ކޮންޓުރޯލުކުރުމުގެ ފުރުސަތު ބިދޭސީ ވިޔަފާރިތަކަށް ލިބިގެންދާނެ ކަމަށެވެ.

މިއީ 2023 ވަނަ އަހަރުގެ ފެބްރުއަރީ 7 ވަނަ ދުވަހުން ފެށިގެން 9 ވަނަ ދުވަހުގެ ނިޔަލަށް މި މައްސަލާގައި މިހާރުގެ ސަރުކާރުގެ ވެރިންނާއި އެބޭފުޅުންގެ ޕާޓީތަކުން ކަންކުރެއްވި ގޮތެވެ. ދެއްކެވި ވާހަކަފުޅެވެ. މިހާރު އެއިން އެއްވެސް ވާހަކަފުޅެއް ހަނދުމަފުޅު ހުރި ބޭފުޅަކު އޭގެ ތެރޭގައި ނެތެވެ.

މިއަދު އަނެއްކާވެސް އެޗްޑީސީން މިހާރު އެއޮތީ ތިލަފުށިން ބިން ވިއްކަން އިއުލާނުކޮށްފައެވެ. ބިދޭސީންނަށްވެސް ބިން ގަނެވޭނެ ގޮތަށެވެ. މިކަމުގައި ރައީސް ސޯލިހެކޭ ރައީސް މުއިއްޒެކޭ ފަރަގެއް ނެތެވެ. މާލެ ސަރަހައްދުން އަގުބޮޑު ބިންތައް ބިދޭސީންނަށް ދިގު މުއްދަތަށް ހޯދޭނެ މަގު ދެ ބޭފުޅުންވެސް ހުޅުވައިލެއްވީ އެކަމުގައި އެކުލެވޭ ގެއްލުން އެނގިވަޑައިގެން ތިއްބަވައެވެ. ރައީސް ސޯލިހަށް އެނގިވަޑައިނުގަތަސް ރައީސް މުއިއްޒާއި އެމަނިކުފާނުގެ ސަރުކާރުގެ ވެރިންނަށް އެކަންކަން އެނގިވަޑައިގަންނަވާކަން އެ ބޭފުޅުން ކުރިން ދައްކަވާފައި ހުރި ވާހަކަފުޅުތަކުން ސާފުވެއެވެ.