ފަތުރުވެރިކަމުގެ ސިނާއަތުގައި ދިވެހިންނާ އަދި ބިދޭސީންގެ މެދުގައި ގެންގުޅެމުން އަންނަ މުސާރައިގެ ފަރަގު ނައްތާލަން ޖެހޭ ކަމަށް ރައީސް އަބްދުﷲ ޔާމީން އަބްދުލްގައްޔޫމު ވިދާޅުވެއްޖެއެވެ.

ޕީއެންއެފުން މަޖިލިހަށް ކުރިމަތިލާ ކެންޑިޑޭޓުންގެ ސިޔާސަތުތައް ހާމަކޮށް ސުވާލާ ޖަވާބު އުސޫލުން ދަ ފްރޮންޓު އޮފީހުގައި ކުރިއަށް ގެންދާ ޖަލްސާތަކުގެ ތެރެއިން އަންގާރަ ދުވަހުގެ ރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވަނީ މި ސަރުކާރުން ތަަރއްގީއަށް ކުރާ ހޭދަ ކުޑަކޮށް އަދި އުފެއްދުންތެރިކަން ވެސް ނެތުމުންވެސް ނުރުހުން ފާޅުކުރައްވާފައެވެ.

އެގޮތުން ރައީސް ޔާމީން ވިދާޅުވީ، ވަޒީފާގެ ފުރުސަތުތައް އިތުރުކޮށްދީ ޒުވާނުންނާ ދިވެހިންނަށް ފުރުސަތު ފަހިކޮށްދިނުމަކީ ސަރުކާރުގެ ޒިންމާ އެއް ކަމަށާ އޭގެ އިތުުރުން ވަޒީފާގެ މައިދާނުގައި ހުންނަ ފަރަގުތައް ނައްތާލާ އިންސާފާ ހަމަހަމަކަން ގާއިމުކުރުމަކީ ސަރުކާރެއްގެ ޒިންމާ ކަމަށެވެ.

އެގޮތުން ރައީސް ޔާމީން ވަނީ ފަތުރުވެރިކަމުގެ ސިނާއަތުގައި ހުންނަ މުސާރައިގެ ފަރަގާ މެދު ކަންބޮޑުވުން ފާޅުކޮށްފައެވެ. އެގޮތުން ދިވެއްސަކާ ބިދޭސީއަކު އެއް ދާއިރާއަކުން އެއް ރޮގަކުން މަތީ ތައުލީމު ދުނިޔޭގެ ޔުނިވާރސިޓީތަކުން ޙާސިލުކޮށްފައި ތިއްބަސް ދިވެހި މީހާގެ މުސާރައިގެ ކުޑަކަން ރައީސް ޔާމީން ފާހަގަކުރެއްވިއެވެ.

އެމަނިކުފާނުގެ ޒައާމަތުގައި ކޮންމެ އަހަރަކަށް 10 ރިސޯޓް ޓާގެޓްކޮށް 5 އަހަރު ނިމުނު 50 އައު ރިސޯޓް އެޅިފައިވާކަމަށާއި 20 ރިސޯޓްގެ މަސައްކަތް ނިމެން ގާތްވެފައި ހުރި ކަމަށް ރައީސް ޔާމީން ފާހަގަކުރެއްވިއެވެ.

ރިސޯޓްތައް ގާއިމް ކުރެވުމުން އެ ރިސޯޓްތަކުގައި މަސައްކަތް ކުރާނެ މުވައްޒަފުންގެ ގޮތުގައި ދިވެހިންނަށް ވަނީ ފުރުސަތުތަކެއް އޭރު ދެވިފައިކަމަށާއި ވަޒީފާ އުފައްދަން ޖެހެނީ އެފަދައިންކަމަށް ރައީސް ޔާމީން ވަނީ ވިދާޅުވެފައެވެ.