ކުރީގެ ރައީސް އިބްރާހިމް މުހައްމަދު ޞާލިހް ރައީސް އަބްދުﷲ ޔާމީންގެ ނެންގެވި ލޯންތަކުގެ ވާހަކަތައް ދެއްކުމުން، އެވާހަކަތައް ދައްކަން ލަދުވެތިވާން ޖެހޭނެކަމަށް ޕީއެންއެފްގެ ފަރާތުން ކުރިޔަށް އޮތް މަޖިލިސް އިންތިޚާބްގައި ހެންވެއިރު ދެކުނު ދާއިރާއަަށް ވާދަކުރައްވާ ކެންޑިޑޭޓް އިބްރާހިމް މުހައްމަދު (ނިޝާން) ވިދާޅުވެއްޖެއެވެ.

ނިޝާން މިފަދައިން ވިދާޅުވެފައިވަނީ އާދިއްތަ ދުވަހުގެ ރޭ ފްރޮންޓް އޮފީހުގައި ބޭއްވި ޖަލްސާގައި ވާހަކަދައްކަވަމުންނެވެ.

އެގޮތުން ނިޝާން ވިދާޅުވީ ރައީސް ޔާމީން ނެންގެވި ލޯންތަކަކީ އެ ލޯންތަކުގެ ސަބަބުން ދިވެހިރާއްޖޭގެ ރައްޔިތުންނަށް ފައިދާ ކޮށްފައިވާ ލޯންތަކެއްކަމަށެވެ.

ލޯން ނަގައިގެން ލޯންތައް ނުދައްކަވާ އެމަނިކުފާނު ނުހުންނަ ކަމަށްވެސް ނިޝާން ވިދާޅުވިއެވެ.

ރައީސް ޔާމީން ނެންގެވި ލޯން ތަކުން ވެލާނާ އިންޓާރނޭޝަނަލް އެއާޕޯޓް އަނބުރާ ދިވެހިންނަށް ހޯދައިދީ، 25 ބުރީގެ ސިއްހީ ހިދުމަތްދޭ ދަރުމަވަންތަ ހޮސްޕިޓަލް އެޅުއްވިކަމަށްވެސް ނިޝާން ވިދާޅުވިއެވެ.

ނިމިދިޔަ ފަސް އަހަރު އިބްރާހިމް މުހައްމަދު ޞާލިހް ވެރިކަމުގައި ހުންނަވާ ނެންގެވި ލޯންތަކަކީ ގުނާ އަދަދުވެސް ނުކުރެވޭހާ ގިނަ ލޯންތަކެއް ކަމަށްވެސް ނިޝާން ފާހަގަކުރެއްވިއެވެ.

އެހެންކަމުން ރައީސް ޔާމީން ނެންގެވި ލޯންތަކުގެ ވާހަކަތައް ދައްކަވަން ލަދުވެތި ވާންޖެހޭނެ ކަމަށްވެސް ނިޝާން ވިދާޅުވިއެވެ.

އޭގެއިތުރުން ނިޝާން ވިދާޅުވީ ރައީސް ޔާމީންގެ ފަސް އަހަރުގައި 30 އަހަރުގައި ނުފެންނަ ވަރުގެ ތަރައްގީ މި ގައުމަށް ފެނިފައިވާނެކަމަށެވެ.