ޒަމާނީ ފެންވަރަށް އަމީނީމަގު ތަރައްގީ ކުރުމަށް 2023 ވަނަ އަހަރު ފެށުނު މަޝަރޫއުގެ ދަށުން އެ މަގުގައި ތާރު އެޅުން ފުރިހަމަ ކުރުމަށް ފަހު، އަމީނީ މަގު އެއްކޮށް އާންމުންނަށް ހުޅުވާލައިފިއެވެ.

އަމީނީ މަގުގެ މަސައްކަތް ހަވާލުކޮށްފައިވާ ރޯޑް ޑިވެލޮޕްމެންޓު ކޯޕަރޭޝަން- އާރުޑީސީއިން އެކްސްގައި ކުރި ޕޯސްޓެއްގައި ބުނެފައިވަނީ އެ މަގުގެ 12 އަދި 13 ވަނަ ސެގްމެންޓުގައި ތާރު އަޅައި ނިމި، އެ ސަރަހައްދު މިހާރު ވަނީ އާންމުންނަށް ހުޅުވާލެވިފައިކަމަށެވެެ.

އަމީނީ މަޑު ޒަމާނީ ފެންވަރަށް ތަރައްގީކުރުމަށް ދައުލަތުން 84 މިލިއަން ރުފިޔާ ޚަރަދުކޮށްފައިވާއިރު، 13 ސެގްމެންޓަކަށް ބަހާލައިހެން އަމީނީ މަގުގެ ޖުމްލަ 1.7 ކިލޯމީޓަރުގައި ވަނީ ތާރު އަޅާފައިއެވެ.

މީގެ އިތުރުން އެ މަގުގައި ފެން ހިންދާ ނިޒާމު ގާއިމުކޮށް މަގުބައްތި ޖެހުމުގެ މަސައްކަތްވެސް އެ ކުންފުނިން ދަނީ ކުރަމުންނެވެެ.

ކުރީގެ ރައީސް އިބްރާހިމް މުހައްމަދު ސޯލޮހުގެ ވެރިކަމުގައި އަމީނީ މަގުގެ 11 ސެގެމެންޓެެއް ނިންމުމަށް ފަހު މަސައްކަތުގެ ދުވެލި ލަސްވުމުން ވަނީ ވަގުތީގޮތުން މެދު ކަނޑާލާފައިއެވެ.

މި ސަރުކާރުން ވެރިކަމާ ހަވާލުވުމަށް ފަހު އަމީނީ މަގުގެ މަސައްކަތް ވަނީ އަލުން ފަށާފައިއެވެ.