ޣައްޒާގެ ހަމާސް ޖަމާއަތުން ހިންގާ ސަރުކާރުގެ މީޑިއާ އޮފީހުން މައުލޫމާތު ހިއްސާކުރާ ގޮތުން ޣައްޒާގެ އުތުރުގެ ސަރަޙައްދުތަކަށް ވައިގެ މަގުން ވައްޓާލި ބޭނުންވާ އެހީ ނަގަން އުޅުމުގެ ތެރޭގައި ފަލަސްތީނުގެ 18 މީހަކު ޝަހީދުވެއްޖެއެވެ.

ކާބޯތަކެތީގެ ޕެކޭޖްތައް ނެގުމަށް މޫދަށް އެރި އުޅެނިކޮށް 12 މީހަކު ގެނބިގެން މަރުވެފައިވާއިރު، އަނެއް 6 މީހުން މަރުވެފައިވަނީ އެހެނިހެން އެހީގެ ޕެކޭޖްތައް ބިންމައްޗަށް ވެއްޓުމުން "ސްޓޭމްޕެޑް" ގައި ކަމަށް ވިދާޅުވިއެވެ.

ޕެންޓަގަން އިން ބުނީ މިދިޔަ ހޯމަ ދުވަހު ވައިގެ މަގުން ވައްޓާލި 80 ޕެކޭޖުގެ ތެރެއިން ތިން ޕެކޭޖަކީ ޕެރަޝޫޓް މައްސަލަތަކެއް ހުރި ޕެކޭޖެއް ކަމަށާއި އެ ޕެކޭޖް ވެއްޓުނީ ސްޓްރިޕްގެ އައްސޭރިފަށުން ކަމަށެވެ.

ހަމާސް އިން ވަނީ ހުޅަނގުގެ ގައުމުތަކުން ޣައްޒާއަށް ވައިގެ މަގުން އެހީ ފޮނުވުން ހުއްޓާލުމަށް ގޮވާލައި، އިންސާނީ އެހީތެރިކަން ފޯރުކޮށްދިނުމުގެ އުސޫލަކީ "ހަރުކަށި، ގޯސް، ނުރަނގަޅު އަދި ބޭކާރު" އުސޫލެއް ކަމަށް އިންޒާރު ދީފަ އެވެ. ހަމާސް ޖަމާއަތުން ފެށުނީއްސުރެ އެއާޑްރޮޕްތަކަށް ވަރަށް ބޮޑަށް ފާޑުކިޔަމުން އަންނަ އިރު، އެއީ ބޭކާރު އަދި އެހީ ގެނައުމަށް އެންމެ ރަނގަޅު ގޮތް ނޫން ކަމަށް ހަމާސް އިން ވަނީ ބުނެފައެވެ.

ހާއްސަކޮށް އުތުރުގައި އެހީ ބެހުމުގައި ދަތިތަކެއް ކުރިމަތިވެފައިވާތީ، ޣައްޒާއަށް އެތެރެވާނީ ބޭނުންވާ ސާމާނުގެ ފަސްބައިކުޅަ އެއްބައި ކަމަށް އެހީދޭ އެޖެންސީތަކުން ބުނެއެވެ. އދއިން އިސްރާއީލުގެ ކަމާބެހޭ ފަރާތްތަކުން އެހީގެ ސަޕްލައި އަށް ހުރަސް އަޅަމުންދާ ކަމަށް ތުހުމަތުކޮށްފައިވާއިރު، އިސްރާއީލުން ބުނެފައިވަނީ އެގައުމަށް އެއްވެސް ހުރަހެއް ނެތް ކަމަށާއި އެހީ ނުލިބުމަކީ ބައިނަލްއަގްވާމީ އިދާރާތަކުން ލޮޖިސްޓިކް ފެއިލްވުމުގެ ސަބަބުން ދިމާވާ ކަމެއް ކަމަށެވެ