މާލޭ ސަރަހައްދުގައި ގާއިމުކުރާ ބައިނަލްއަގްވާމީ ޕޯޓު ދުބާއި ވޯލްޑަށް ވިއްކާލުމަކީ ޖީއެމްއާރަށް އެއާޕޯޓު ދިނުން ފަދަ ޖަރީމާއެއް ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ޕީއެންއެފްގެ ފަރާތުން ރައްޔިތުންގެ މަޖިލީހުގެ އިންތިހާބުގައި ވާދަ ކުރައްވާ ކެންޑިޑޭޓުންގެ ސިޔާސަތުތައް ހާމަކުރުމަށް ބާއްވާ ޖަލްސާތަކުގެ ތެރެއިން އާދިއްތަ ދުވަހުގެ ރޭ ބޭއްވި ޖަލްސާގައި ރައީސް ޔާމީން ވަނީ ތިލަފުށީ ބަނދަރު ނުވަތަ ބިން ދުބާއީ ވޯލްޑަށް މި ސަރުކާރުން ވިއްކާލަން އުޅޭތީ ކަންބޮޑުވުން ފާޅުކުރައްވާފައެވެ.

ރައީސް ޔާމީން ވިދާޅުވީ އެމަނިކުފާނުގެ ޒައާމަތުގައިވެސް ޕޯޓު ދޫކޮށްލަން ފުރުސަތު އެތައް ފަހަރެއްގެ މަތިން ދުބާއީ ވޯލޑުން ދިން ކަމަށާ ނަމަވެސް އެމަނިކުފާނު އެހެން އެކަން ނުކުރެއްވީ އެކަމުގެ ގެއއްލުން ދިވެހިންނަށް ނުހަނު ބޮޑުވުމުން ކަމަށެވެ.

އެގޮތުން 99 ވަރަކަށް އަހަރަށް ތަން ދޫކޮށްލާއިރު އޭގެން ލިބޭ ފައިސާއަށް ވުރެ ދިވެހިން އަމިއްލައަށް ތަން ތަރައްގީކުރުމުން ލިބޭ ފައިދާ ބޮޑުވެފައި އެކަމަކީ ދިވެހިންނަށް އަމިއްލަ ކުރެވޭނެ ވަރު ކަމަކަށް ވުމުން އެމަނިކުފާނު އެތަން ދޫކޮށްލަން ބޭނުންފުޅުވެވަޑައިނުގެންނެވީ ކަމަށެވެ.

މީގެ އިތުރުން ދުބާއީ ވޯލްޑަށް އެތަން ދޫކޮށްލިނަމަ އެތަން ވާނީ އިންޑިއާގެ ކޮޗިންގައި އެ ކުންފުނިން އަޅާފައިވާ ބައިނަލްއަގްވާމީ ބަނދަރުގެ ސަބް ސްޓޭޝަނަކަށް ކަމަށްވެފައި އެހާ ހިސާބުން ރާއްޖޭގެ ބަނދަރުގެ ހުރިހާ ކަމެއް ހިންގާނީ އިންޑިއާގެ އެ ބަނދަރުގެ ބެލުމުންގެ ދަށުން ކަމަށް ވުމުން އެމަނިކުފާނު އެގޮތް ބޭނުންފުޅު ވެވަޑައިނުގެންނެވީ ކަމަށް ވެސް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ ކިރިޔާ އިގްތިސޯދުގެ ކުޑަ މިންވަރެއް އެނގޭ މީހަކު ނަމަވެސް އެކަން އެ ގޮތަށް ނުކުރާނެ ކަމަށާ ދުބާއީ ވޯލްޑަށް މާލެ ޕޯޓު ވިއްކާލައިގެން ހިންގަން އުޅެނީ އިގްތިސޯދީ ބޮޑު ޖަރީމާ އެއް ކަމަށެވެ.