ރައީސް އަބްދުﷲ ޔާމީން 11 އަހަރަށް ޖަލަށްލުމުން ހައިކޯޓުގައި އިސްތިއުނާފް ކޮށްފައިވާ މައްސަލައިގެ ހުކުމް ކުރުން ލަސްކުރަނީ ސަރުކާރުގެ މަތީ ފަންތިން ކޯޓަށް ނުފޫޒު ފޯރުވައިގެން ކަމަށް އެމަނިކުފާނު ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ، 20 ވަނަ ރައްޔިތުންގެ މަޖިލިހަށް ޕީއެންއެފްގެ ޓިކެޓުގައި ވާދަކުރާ ކެންޑިޑޭޓުންގެ ސިޔާސަތުތައް ހާމަކުރުމަށް ދަ ފްރޮންޓު އޮފީހުގައި ބާއްވަމުން ގެންދާ ޖަލްސާތަކުގެ ތެރެއިން އާދިއެްތަ ދުވަހުގެ ރޭ ބޭއްވި ޖަލްސާގައި ހިތާދޫ ދާއިރާއަށް ވާދަކުރާ ޝަރީފާ ސައީދަށް އަމާޒުކުރެއްވި ސުވާލެއްގެ ތެރެއިންނެވެ.

ރައީސް ޔާމީން މިނިވަން ކޮށްދެއްވާނެ ކަމަށް، ވެރިކަމަށް ވަޑައިގެންނެވުމުގެ ކުރިން ރައީސް ޑރ. މުހައްމަދު މުއިއްޒު ވަނީ ވައުދުވެވަޑައިގެންފަ އެވެ. ނަމަވެސް ވެރިކަމަށް ވަޑައިގެންނެވުމަށްފަހު އެމަނިކުފާނު ވިދާޅުވެފައި ވަނީ ކޯޓުތަކަށް އެމަނިކުފާނު ނުފޫޒު ނުފޯރުއްވާނެ ކަމަށެވެ.

އެކަމަށް އިޝާރާތްކުރައްވާ ރައީސް ޔާމީން ވަނީ ރައީސް މުއިއްޒުގެ އެ ވައުދުފުޅާ ގުޅޭ ގޮތުން ވަރަށް ކުރުކޮށް ވާހަކަ ދައްކަވާފައެވެ. ރައީސް ޔާމީން ވިދާޅުވީ، މިހާރު ކުރިއަށްދާ ރައްޔިތުންގެ މަޖިލީސް އިންތިހާބުގެ ކެމްޕޭނަށް ޑޯޓުޑޯއަށް ވަޑައިގަތުމުން ރައްޔިތުން އެމަނިކުފާނާ އެންމެ ގިނައިން ކުރާ އެއް ސުވާލަކީ ރައީސް ޔާމީން މިނިވަން ކުރުމާ ގުޅޭ ގޮތުން ކަމަށެވެ.

ރައީސް ޔާމީން ވިދާޅުވީ، އެމަނިކުފާނު މިނިވަންކުރަން ސަރުކާރުގެ ތެރެއިން ޚާއްސަކޮށް ރައީސް މުއިއްޒު މަސައްކަތްނުކުރައްވާ ކަމަށާ އިސްތިއުނާފު މައްސަލައަށް "އަތް ބާނަނީ" ސަރުކާރުގެ މަތި ފަޑިން ކަމަށެވެ.

ރައީސް ޔާމީންގެ އިސްތިއުނާފު ނިމި އެތައް ދުވަހެއް ފަހަނަ އަޅާ ގޮސްފައިވާއިރު އެ މައްސަލައިގައި އަދިވެސް ހުކުމްކޮށްފައިނުވެއެވެ. މިކަމާ ގުޅިގެން ގިނަ ބައެއްގެ ނުރުހުން ދަނީ ސަރުކާރަށާ ޝަރުއީ ނިޒާމަށްވެސް އަމާޒުވަމުންކަން ފާހަގަކޮށްލެވެއެވެ.