ޕީޕަލްސް ނެޝަނަލް ފްރަންޓް (ޕީއެންއެފް) ވެގެން ދާނީ ކުރިއަށް އޮތް ތަނުގައި ރާއްޖޭގެ އެންމެ ބޮޑު ސިޔާސީ ޕާޓީ އަށް ކަމުގައި ޕާޓީ އުފެއްދުމުގައި އިސްކޮށް ހަރަކާތްތެރިވާ މުހައްމަދު މަލީހު ޖަމާލް ވިދާޅުވެއްޖެ އެވެ.

މަލީހް މިފަދައިން ވިދާޅުވެފައިވަނީ ފްރޮންޓް އޮފީހުގައި ބޭއްވި ނޫސްވެރިންގެ ބައްދަލުވުމުގައި އެވެ.

އެގޮތުން މަލީހް ވިދާޅުވީ ޕީއެންއެފަށް މެމްބަރުން އިތުރު ކުރުމުގެ މަސައްކަތް ރާއްޖޭގެ އެކިކަންކޮޅުތަކުގައި ވަރަށް އަވަހަށް ފަށާނެ ކަމަށެވެ.

އަދި ޕީއެންއެފް ވާނީ ދިވެހި މަސްލަހަތު އެންމެ ބޮޑަށް ހިމާޔަތްކޮށް، ދިވެހި ގައުމިއްޔަތު އެންމެ ބޮޑަށް ހިމާޔަތް ކުރާނެ އިސްލާމް ދީން ކުރިއަރުވާނެ ޕާޓީއަށް ކަމުގައި މަލީހު ވިދާޅުވި އެވެ.

މަލީހު ވިދާޅުވީ ރައީސް ޔާމީނަކީ ޓެސްޓް ކުރެވިފައިވާ ދުނިޔޭގެ ފެންވަރުގެ ލީޑަރެއްކަމަށެވެ.

ޕީއެންއެފްގެ އަސާސީ ސިފައަކަށް ވެގެންދާނީ ރައީސް ޔާމީންގެ ފަލްސަފާ ކުރިއެރުވުމާއި ސިޔާސީ ފަލްސަފާގެ މައްޗަށް ބިނާކޮށް ދިވެހި ރައްޔިތުން އެދޭ ފަދަ އިސްލާހީ ހެޔޮ ބަދަލެއް ގެނައުމާ އެކުގައި ރާއްޖެ އަށް ތަރައްގީ ގެނައުން ކަމުގައި ކަމަށް މަލީހު ވިދާޅުވި އެވެ.

ޔާމީން އިސްވެ އުފައްދަވާ ޕީއެންއެފް އުފެއްދުމަށް ބޭނުންވާ އަދަދަށް މެމްބަރުން ހަމަކުރުމުން އެ ޕާޓީ އުފެއްދުމުގެ ބައްދަލުވުން ބޭއްވުމުގެ ހުއްދަ އިލެކްޝަންސް ކޮމިޝަން (އީސީ) އިން ވަނީ ދީފަ އެވެ.