ރައީސުލްޖުމްހޫރިއްޔާ ޑރ. މުހައްމަދު މުއިއްޒު ސިޔާސީ ގޮތުން ބާރު ދަށްވަމުން ދާކަން އެނގިވަޑައިގެން ޕީއެންއެފް އުފެއްދުމުގެ ޖަލްސާއަށް ހުރަސް އެޅި މައްސަލައިން ރެކިވަޑައިގަންނަވަން މަސައްކަތް ފައްޓަވައިފި އެވެ.

ރައީސް އަބްދުﷲ ޔާމީން އިސްވެ ހުންނަވައި ރަޖިސްޓްރީ ކޮށްފައިވާ ޕީޕަލްސް ނެޝަނަލް ފްރަންޓް، ޕީއެންއެފް އުފެއްދުމުގެ ގޮތުން ޣިޔާޘުއްދީން ސްކޫލުގައި ޖަލްސާއެއް ބާއްވަން ހަމަޖެހުނީ މިމަހުގެ 9 ވަނަ ދުވަހުގެ ރެއެވެ. ސްކޫލު ހޯލަށް ޕާޓީގެ މެމްބަރުން ޖަމާވަމުން ދަނިކޮށް އެސްއޯ ފުލުހުން އެސަރަހައްދަށް ގޮސް ޖަލްސާއަށް ހުރަސް އެޅި އެވެ. އެއާއެކު ހަމަނުޖެހުން އުފެދި ޕާޓީގެ މެމްބަރުން ވަނީ މާލޭގެ ހެންވޭރުގައި ހުންނަ ބްރިޖު ވިއު ޕްލެޓްފޯމަށް ގޮސް ޖަލްސާ ބާއްވައިފަ އެވެ.

ޕީއެންއެފްގެ ޖަލްސާއަށް ހުރަސް އެޅުމުގެ ގޮތުން އެސްއޯ ފުލުހުން ގިޔާސުއްދީން ސްކޫލު ހުންނަ ސަރަހައްދަށް ފޮނުވީ ސީދާ ރައީސް މުއިއްޒުގެ އެންގެވުމުގެ މަތިންކަމަށް ސަރުކާރުގެ އިސް އޮފިޝަލަކު ޗެނަލް 13 އަށް ވަނީ ކަށަވަރު ކޮށްދީފަ އެވެ. އެހެންނަމަވެސް ޖަލްސާގެ ބައިވެރިންގެ ހިތްވަރާއިއެކު ހިޔާލު ފާޅުކުރުމުގެ މިނިވަންކަމުގެ ހައްގުގެ ބޭނުންކޮށް ބްރިޖު ވިއު ޕްލެޓްފޯމު ސަރަހައްދުގައި ޖަލްސާ ކުރިއަށް ގެންދަން ފެށުމުން ސަރުކާރުގެ އެތެރޭގައި ވަނީ މައްސަލަ ހޫނުވެފަ އެވެ.

ޑިމޮކްރަސީއާއި ބީރައްޓެހި އަމަލުތަކެއް މުއިއްޒުގެ އަމުރަށް އެސްއޯ ފުލުހުން ކޮށްފައިވާކަމުގެ އަޑުތައް ސޯޝަލް މީޑިއާގެ އެކި ޕްލެޓްފޯމުތަކުގައި ގަދަވުމާއިއެކު ސްޕޯޓްސް މިނިސްޓްރީން ވަގުތުން ވަނީ ޕީއެންއެފްގެ ޖަލްސާ ބާއްވަން ސޯޝަލް ސެންޓަރުގެ ހޯލު ދޫކޮށްފައިވާކަމަށް ބުނެ އެކްސްގައި ޕޯސްޓުކޮށްފަ އެވެ. އަދި އެކަން ޕީއެންއެފްއަށް އެންގިކަމަށް ބުނެ ވަނީ އިތުރުފުޅު ހައްދަވައިފަ އެވެ.

މައުލޫމާތު ލިބޭ ގޮތުގައި ޕީއެންފްއިން ޖަލްސާއަށް ތައްޔާރުވަމުން ދިޔައިރު ސަރުކާރުގެ މަތީ ފަޑިން ތިން ބޭފުޅަކު މިޖަލްސާ ބޭއްވިޔަ ނުދިނުމަށް އިސްސަފުގައި މަސައްކަތް ކުރެއްވި އެވެ. އެއީ ރައީސް މުއިއްޒުގެ އިތުރުން އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އާއި ހޯމް މިނިސްޓަރު އަލީ އިހުސާން އެވެ. އެގޮތުން ޕީއެންއެފްގެ ޖަލްސާ ބާއްވަން ހޯލު ދޫކުރި ގިޔާސުއްދީން ސްކޫލުގެ ވެރިންނަށް ބިރު ދެއްކުމަށް ޑރ. ޝަފީއުއަށް ރައީސް މުއިއްޒު އެންގެވިކަމަށް ވެއެވެ. އަދި އެސްއޯ ފުލުހުން ފޮނުވައިގެން ބައިވެރިންނަށް ނުވަދެވޭނެހެން ސްކޫލު ބަންދުކުރަން މިނިސްޓަރު އިހުސާންއަށް އެންގެވިކަމަށްވެ އެވެ.

މީގެ އިތުރުން އިލެކްޝަންސް ކޮމިޝަންގެ މެމްބަރުންނަށް ގުޅައި ޖަލްސާގައި އެ ކޮމިޝަންގެ އެއްވެސް މެމްބަރަކު ބައިވެރިނުވާން ސީދާ ރައީސް އެންގެވިކަމަށް މައުލޫމާތު ލިބެ އެވެ. އެހެންނަމަވެސް ކޮމިޝަންގެ މެމްބަރުން އެކަމަށް ދެކޮޅު ހައްދަވައި ދަން ގަޑިއެއްގައި ބޭއްވި ޖަލްސާއަށް ވަޑައިގެން ޕީއެންއެފް އުފެދުނު ކަމުގެ ލިޔުންވެސް އެޕާޓީއާއި ވަނީ ހަވާލުކޮށްފަ އެވެ.

ސަރުކާރުގެ ރޭވުންތައް ފެއިލްވުމުން ރައީސް މުއިއްޒު ވަނީ އެސްއޯ ފުލުހުން ގިޔާސުއްދީން ސްކޫލަށް ދިޔައީ އެމަނިކުފާނަށް އެނގުމަކާއި ނުލައިކަމަށް ވިދާޅުވެ އިތުރުފުޅު ހައްދަވައިފަ އެވެ. އަދި ޑިމޮކްރަސީގެ އެއްވެސް ހަރަކާތަކަށް ހުރަސް އެޅުމަކީ ސަރުކާރުގެ ސިޔާސަތު ނޫންކަމަށާއި މިކަމާއިހުރެ އެރޭ ނިދި ނުކުރައްވާކަމަށްވެސް ރައީސް ވިދާޅުވި އެވެ. މިމައްސަލަ ބައްލަވައި ކަމާއިބެހޭ ފަރާތްތަކަށް ފިޔަވަޅު އަޅުއްވާނެކަމަށްވެސް މުއިއްޒު ވިދާޅުވި އެވެ.

އިއްޔެ އިރުއޮއްސުނުއިރު އެސްއޯ ފުލުހުންގެ މައްސަލަ ބަލައި ޕޮލިސް ކޮމިޝަނަރު އަލީ ޝުޖާއުގެ އިސްތަށިފުޅުގައި އިހުމާލުވިކަމުގެ ތުހުމަތު އަޅުވާފައިވާއިރު ބެލެވޭ ގޮތުގައި މިކަން ކޮށްފައިވަނީވެސް ސީދާ ރައީސް މުއިއްޒުގެ އެންގެވުމުގެ މަތިންނެވެ. އިތުބާރު ހުރި މަސްދަރަކުން މައުލޫމާތު ލިބޭ ގޮތުގައި ސަރުކާރުން މަސައްކަތް ކުރަނީ ސީޕީ ޝުޖާއު މަގާމުން ވަކިކުރާށެވެ. މުޅި މައްސަލަ މިހާ ހިސާބުން ނިންމާލައި ގަވާއިދުތައް އިސްލާހު ކުރުމުގެ ނަމުގައި ރައީސް މުއިއްޒު މަސައްކަތް ކުރައްވަނީ މިކަން އޮއްބައިލާށެވެ.

ފުލުހުންނަށް ރައީސް މުއިއްޒު ކުރެއްވި ގައިރު ގާނޫނީ އަމުރަށް ތަބާނުވި ފުލުހުންގެ މައްސަލަވެސް ބަލަމުން ދާކަމަށް މައުލޫމާތު ލިބެ އެވެ. އެހެންނަމަވެސް މިމައްސަލަ ފުލުހުންގެ އެތެރޭގައި ވަރަށް ބޮޑަށް ހޫނުވުމުން އިތުރު ފުލުހުންގެ މައްސަލަތައް މިހާރު ނުބަލަން ވަނީ އަންގައިފަ އެވެ.

ޕީއެންއެފްގެ މެމްބަރުން ގިޔާސުއްދީން ސްކޫލު ކުރިމަތީގައި އިހުތިޖާޖު ކުރަމުން ދިޔައިރު ޗެނަލް 13 އިން ދިޔައީ އެމަންޒަރުތައް ވަގުތުން ދައްކަމުންނެވެ. އޭރު ސަރުކާރުގެ އިސް ބޭފުޅުން ގެންދެވީ އެމަންޒަރުތައް ލައިވްކޮށް ބަލައި ސަރުކާރުގެ ކުންފުނިތަކުގައި މަސައްކަތްކުރާ އެއްވެސް މުވައްޒަފަކު އެތަނުގައި ހުރިނަމަ ގުޅައި ވަޒީފާއިން ވަކިކުރާނެކަމުގެ އިންޒާރު ދެމުންނެވެ.

ޕީއެންއެފް އުފެއްދުމަށް ބޭއްވި ޖަލްސާއަށްފަހު ރައީސް މުއިއްޒުއާއި ސަރުކާރުގެ ވެރިން އިތުރުފުޅު ހެއްދެވީ ހާއްސަ ޕީއާރު ޕްރޮޖެކްޓެއްގެ ގޮތުގައި ރައީސް އޮފީހުގެ ތެރެއިންނެވެ. މިއީ ކުރިއަށް އޮތް މަޖިލިސް އިންތިހާބުގެ ނަތީޖާއަށް އަސަރުކޮށްފާނެ ކަމެއްކަމަށް ބަލައި ރައީސް މުއިއްޒު ވަނީ މިމައްސަލަ ބައިނަލްއަގުވާމީ މީޑިއާތަކާއި ހަމައަށް ނުގެންގޮސް ހިފެހެއްޓުމަށްވެސް ޕީއާރު ޓީމަށް އަންގައިފަ އެވެ.

ޕީއެންއެފް އުފެއްދުމުގެ ގޮތުން ބޭއްވި ޖަލްސާ ޗެނަލް 13 އިން ލައިވް ކުރިއިރު އެތައް ހާސް ބަޔަކު ގެންދިޔައީ އެމަންޒަރުތައް އެކި ޕްލެޓްފޯމުތައް މެދުވެރިކޮށް ބަލަމުންނެވެ. އެގޮތުން އެކްސްއާއި ފޭސްބުކް ލައިވް ސްޓްރީމަށް އާންމުންގެ ފަރާތުން އެރޭ ބޮޑު ތަރުހީބެއް ލިބުނެވެ.

ފާހަގަކޮށްލެވޭ ގޮތުގައި ރައީސް އަބްދުﷲ ޔާމީންގެ މައްޗަށް ރައީސް އިބްރާހިމް މުހައްމަދު ޞާލިހުގެ ސަރުކާރުގައި ކޯޓުން ކުރި ހުކުމަކީ ހަރާމް ހުކުމެއްކަމަށް އޭރު އިދިކޮޅުގައި ތިއްބަވައި ރައީސް މުއިއްޒުއާއި މިހާރު ސަރުކާރުގެ އެތައް އިސް ވެރިންނެއް އެކި ފަހަރު މަތިން ވަނީ އޭރު ފާޅުގައި ގޮވާލައިފަ އެވެ. އެހެންނަމަވެސް ވެރިކަމަށް ވަޑައިގެން ރައީސް ޔާމީންގެ ޝަރީއަތަށް ހުރަސް އެޅުމަށް ރައީސް މުއިއްޒު ގެންދަވަނީ މަސައްކަތް ކުރައްވަމުންނެވެ. އަދިވެސް ރައީސް ޔާމީން ހުންނެވީ ޖަލު ހުކުމެއްގަ އެވެ.