އެޗް1އެން1 އިންފްލުއެންޒާ ޖެހުމާއި ގުޅިގެން އެކަކު މަރުވެ 3 މީހަކަށް މިހާރު ވެންޓިލޭޓަރުގައި ފަރުވާ ދެމުންދާކަމަށް ސިއްހީ ޚިދުމަތްތެރިއެއް ކަމަށް ވާ ޑރ.މުހައްމަދު އަލީ ހާމަކޮށްފިއެވެ.

ޑރ.މުހައްމަދު އަލީ މިކަން ހާމަކޮށް ފޭސްބުކުގައި ކޮށްފައިވާ ޕޯސްޓުގައި ވާ ގޮތުން މިހާތަނަށް މި ބަލީގައި ޒުވާނަކު ވަނީ މަރުވެފައެވެ. އަދި މީހަރު އިންފްލުއެންޒާ ނިއމޯނިއާ ޖެހިގެން 3 މީހަކަށް ވެންޓިލޭޓަރުގައި ފަރުވާދެމުންދާކަމަށް ވެސް ވަނީ ހާމަކޮށްފައެވެ.

އިތުރަށް އެޕޯސްޓުގައި ވަނީ މިފަދަ ބޮޑެތި ބަލިތަކުން ސަލާމަތްވުމަށްޓަކައި ފްލޫޝޮޓް ޖެހުމަށް އިލްތިމާސްކުރައްވާފައެވެ.

އެގޮތުން ޑރ.މުހައްމަދު އަލީ ވަނީ ރާއްޖޭގައި މިފަދަ ވެކްސިންތައް ޖެހުމަށް އާސަންދައިން އިންޝުއަރެންސް ލިބޭނެ ގޮތެއް ހަދައިދިނުމަށްވެސް ގޮވާލައިފައެވެ.

ސްވައިން ފްލޫ ގެ ނަމުގައި ވެސް ކިޔާ އެޗް1އެން1 ފްލޫ އަކީ އިންފްލުއެންޒާ އޭ ވައިރަސްގެ ވައްތަރެކެވެ. މި ވައިރަސް ބޮޑެތި މީހުންނަށް ފަތުރާ މުއްދަތު ފެށެނީ އަލާމާތްތައް ފެނުމުގެ ގާތްގަނޑަކަށް 1 ދުވަސް ކުރިންނެވެ. މި ވައިރަށް ދިގުދެމިގެންދަނީ އެމީހަކަށް އަލާމާތްތައް ފެނުމުން ގާތްގަނޑަކަށް 5 ދުވަހާއި 7 ދުވަހުގެ ތެރޭގައެވެ.

ދިފާޢީ ނިޒާމު ބަލިކަށިވެފައިވާ ފަރާތްތަކާއި ކުޑަކުދިންގެ ގައިގައި، މި ވައިރަސް ފަތުރާ މުއްދަތު ދިގުވެދާނެއެވެ.

ރާއްޖޭގައި މިފަދަ އެކި ކަހަލަ ބަލިތައް ފެތުރޭ މި ދަނޑިވަޅުގައި އެކަން ކަމަށް ސަމާލުވުމަށް ކަމާއި ބެހޭ އިދާރާތަކުން އަންނަނީ އާންމުންނަށް އިލްތިމާސްކުރަމުންނެވެ.