ރައީސް އޮފީހުގެ އިސް ތަރުޖަމާނުގެ މަގާމް ހުހަށް ހުރީ،ރައީސް މުއިއްޒުގެ އަމުރަށް ހަގީގަތް އޮޅުވާލައިގެން ނޫސްވެރިންނަށް މައުލޫމާތު ދެއްވާނެ ވަރުގެ ތަރުޖަމާނެެއް ނުލިބޭތީ ކަން ހާމަވެއްޖެއެވެ.

ނަން ނުބުނުމަށް ޝަރުތުކޮށް ޗެނަލް 13 އަށް މައުލޫމާތު ދިން ސަރުކާރުގެ އިސް އޮފިޝަލަކު ވިދާޅުވީ ރައީސް މުއިއްޒު އަދިވެސް ތަރުޖަމާނުގެ މަގާމަށް ބޭފުޅަކު ހޯއްދަވަނީކަމަށެވެ.

އެ މަގާމަށް ރައީސް ބޭނުންފުޅުވެލައްވަނީ ރައީސް ވިދާޅުވާ ގޮތުގެ މަތިން ދޮގު މައުލޫމާތު ނޫސްވެރިންނަށާ އާންމުންނަަށް ފޯރުވައިދެވޭނެ ވަރުގެ ފަރާތެކެވެ.

ރައީސް މުއިއްޒު ތަރުޖަމާނެއް ހޯދައްވަމުން ގެންދަވާތާ 4 މަސް ދުވަސްވެއްޖެ ކަމަށާ އަދިވެސް އެމަނިކުފާނު ބޭނުންފުޅުވެލައްވާ ގޮތައް އަމަލު ކުރައްވާނެ ވަރުގެ ފަރާތެއް ނުލިބޭ ކަމަށް އެ އޮފިޝަލް ވިދާޅުވިއެވެ.

ރައީސް އޮފީހުގެ ތަރުޖަމާނެއް ނެތްތާ މިހާރު 4 މަސްވެއްޖެއެވެ.

އެ މަގާމުގައި އެންމެ ފަހުން އަދި އެންމެ ފުރަތަމަ ވެސް ހުންނެވީ ކުރީގެ ބްރޯޑްކާސްޓިންގ ކޮމިޝަންގެ ރައީސް މުހައްމަދު ޝަހީބެވެ.

ޝަހީބު އެ މަގާމަށް ރައީސް މުއިއްޒު އައްޔަން ކުރެއްވީ ވެރިކަމުގެ ހުވާ ކުރެއްވުމަށްފަހުވެސް އެ މަގާމަށް މީހަކު އައްޔަންނުކޮށްގެން ނޫސްވެރިން ޝަކުވާކުރުމުންނެވެ.

ޝަހީބު އެ މަގާމަށް އައްޔަން ކުރުމުން، ދެތިން ފަހަރެއްގެ މަތިން ނޫސްވެރިންގެ ބައްދަލުވުންތައް ވަނީ ރައީސް އޮފީހުގައި ކުރިޔަށް ގެންގޮސްފައެވެ. އެ ބައްދަލުވުންތަކުގައި ނޫސްވެރިން ކުރާ ސުވާލުތަކަށް ޖަވާބުދޭން ޝަހީބަށް ނޭނގެއެވެ. އަދި ފާޅުގައި ޝަހީބަށް ނޭނގޭ ކަމަށްވެސް ވިދާޅުވައެވެ.

ޝަހީބުގެ މި އަމަލުތަކުގެ ސަބަބުން ނޫސްވެރިން ކަންބޮޑުވުން ފާޅުކުރުމުން، ރައީސް މުއިއްޒު ވަނީ ޝަހީބު އެ މަގާމުން ވަކިކޮށް ހާރިޖީ ވުޒާރާގެ ސްޓޭޓް މިނިސްޓަރަކަށް އައްޔަންކުރައްވާފައެވެ.

މިކަން ރައީސް އޮފީހުން ރަސްމީކޮށް އިއުލާންކޮށްފައި ނުވީ ނަމަވެސް އައު އަހަރު ފެށުނު ދުވަހު ރައީސް އޮފީހުގެ ވެބްސައިޓުން ވަނީ މިކަން ޔަގީންވެފައެވެ.

އޭގެ ފަހުން ނޫސްވެރިންނަށް މައުލޫމާތު ދެއްވާނެ ފަރާތެއް ނުހުރެއެވެ. ނަމަވެސް ކެބިނެޓް ބައްދަލުވުންތަކުގައި ނިންމަވާ ކަންކަން ނޫސްވެރިންނާ ހަމަޔަށް ގެނެސްދެނީ ޕްރިންސިޕަލް ސެކެޓްރީ ޓު ދި ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހިމެވެ.

ނާޒިމް ވެސް ޖަވާބު ދެއްވަނީ އެކަންކަމާ ގުޅޭ ގޮތުން އެކަންޏެވެ.

މިހާރު ކެބިނެޓް ބައްދަލުވުންތައް ނާޒިމް ނުބާއްވާތާ ވެސް ގިނަ ދުވަސްތަކެއް ވަނީ ވެފައެވެ.

ސަރުކާރުން ވެރިކަމަށް އައުމަށްޓަކައި އޭރުގައި ބުނީ، މި ސަރުކާރު ވެގެންދާނީ ހާމަކަންބޮޑު ސަރުކާރަކަށް ކަމަށެވެ.

ނަމަވެސް ބަހާ އަމަލާ ދިމާނުވާކަން ފާހަގަކޮށްލެވެއެވެ. އެގޮތުން ނޫސްވެރިންނަށާއި ބައެއް މީޑިޔާތަކާ ދޭތެރޭ ގެންގުޅުއްވާ ތަފާތުކުރުން ހިމެނެއެވެ.

ކަމެއް އޮޅުން ފިލުވުމައްޓާކައި ގުޅުމުން ނުވަތަ މެސެޖް ކުރުމުން ސަރުކާރުގެ އިސް ފަޑީގައި ތިއްބަވާ ފަރާތްތަކުން ޖަވާބު ނުދެެއްވާކަން ފާހަގަކޮށްލެވެއެވެ.

ރައީސް އޮފީހުގެ ކޮމިޔުނިކޭޝަން މިނިސްޓާރ އިބްރާހިމް ހަލީލް ގެންގުޅުއްވާ ތަފާތު ކުރުންތަކުގެ ވާހަކަ އަކީ ބައެއް ނޫސްވެރިންނަށް އައު ވާހަކައެއް ވެސް ނޫނެވެ.

ކަމެއް އޮޅުންފިލުވާލުމަށް މެސެޖް ކުރުމުން ޖަވާބު ދެއްވަނީ ހަލީލް ބޭނުން ގޮތަކަށެވެ.

ހާމަކަންބޮޑު ސަރުކާރުގެ ގިނަ ކަން ކަން ފޮރުވިފައި ހުންނާތީ ގިނަ ބައެއްގެ ފާޑުކިޔުން ސަރުކާރަށް އަންނަނީ އަމާޒުވަމުންނެވެ.