ދިވެހިރާއްޖެއާއި މޮންގޯލިއާއާ ދެމެދު ވެފައިވާ ވިސާ ވެއިވަރ އެއްބަސްވުމުގެ ދަށުން، ދުރާލާ ވިސާ ނެގުމަކާނުލައި މޮންގޯލިއާއަށް އެތެރެވެވޭނެ ކަމަށް ޚާރިޖީ ކަންތައްތަކާ ބެހޭ ވުޒާރާއިން ވިދާޅުވެއްޖެއެވެ.
މި މަހުގެ 12 ވަނަ ދުވަހުން ފެށިގެން ވިސާ އާއި ނުލައި ދަތުރު ކުރެވޭ ގޮތް ހަދާފައިވާއިރު ދެ ޤައުމުގެ ދެމެދު ވިސާ ވެއިވަރ އެއްބަސްވުން ގާއިމްކޮށްފައިވަނީ އޮގަސްޓު މަހު 17 ވަނަ ދުވަހުއެވެ.
މިއެއްބަސްވުމުގެ ދަށުން، ދުރާލާ ވިސާ ނެގުމަކާއި ނުލައި ދިވެހިންނަށް މޮންގޯލިއާއަށް 30 ދުވަހުގެ މުއްދަތަކަށް އެތެރެވެވޭނެއެވެ. ހަމައެންމެ މި އެއްބަސްވުމުގެ ދަށުން މޮންގޯލިއާ ރައްޔިތުންނަށްވެސް ވިސާނެގުމެއް ނެތި 30 ދުވަހުގެ މުއްދަތަކަށް ދިވެހިރާއްޖެއަށް ދަތުރުކުރެވޭނެއެވެ. އަދި ޓްރާންސިޓް ކުރުމުގައިވެސް ވިސާ ނަގާކަށް ނުޖެހޭނެއެވެ.
ނަމަވެސް ތަޢުލީމު ޙާސިލުކުރުމާއި ވަޒީފާއާއި ވިޔަފާރީގެ ބޭނުންތަކަށް ދަތުރުކުރާ މީހުން ދުރާލާ ވިސާ ނަގަންޖެހޭނެ ކަމަށް ވަނީ ހާމަކޮށްފައެވެ.
މިއެއްބަސްވުމާއެކު ދެޤައުމުގެ ރައްޔިތުން އެއް ޤައުމުން އަނެއް ޤައުމަށް ފަސޭހަކަމާއެކު ދަތުރުކުރުމުގެ ފުރުޞަތު ލިބި، ދެ ޤައުމުގެ ގުޅުން އިތުރަށް ހަރުދަނާވެގެންދާނެކަން ފާހަގަކޮށްލެވެއެވެ.
