2024 އޭޕްރީލް 01 ވަނަ ދުވަހު ބޭއްވި ރައްޔިތުންގެ މަޖިލީހުގެ މި އަހަރުގެ ފުރަތަމަ ދައުރުގެ 20 ވަނަ ޖަލްސާގައި ފާސްކޮށްފައިވާ އެންޑި ޑިފެކްޝަން ބިލު ރައީސް ތަސްދީގު ކުރައްވައިފިއެވެ.

ރައްޔިތުންގެ މަޖިލީހަށް ހޮވިވަޑައިގަންނަވާ އިރު އެ މެންބަރަކު ހޮވުނު ޕާޓީ ބަދަލުކޮށްފިނަމަ މަޖިލީހުން އެ މެންބަރަކު އިސްތިޢުފާ ދޭން ޖެހޭ ގޮތަށް މި ބިލް ފާސްކޮށްފައިވެއެވެ.

އެންޓި ޑިފެކްޝަން ގާނޫނުގެ މަގުސަދުތަކުގެ ތެރޭގައި މަޖިލީހަށް ހޮވޭ މެމްބަރުން ޖަވާބުދާރީކުރުވުމާއި، މެމްބަރުންނަކީ ރައްޔިތުންގެ އިތުބާރު ލިބިގެންވާ ބައެއް ކަމުގައި ހެދުން ހިމެނެއެވެ. އަދި މި ޤާނޫނުގެ ދަށުން ގޮނޑި ގެއްލުމުން ބައި އިލެކްޝަން ބާއްވާނެ ގޮތާއި، ގޮނޑި ގެއްލޭ މެމްބަރުންނަށް ވާދަކުރެވޭނެ ގޮތް ހެދުންވެސް މި ގާނޫނުގެ މަގުސަދުތަކުގެ ތެރޭގައި ހިމެނެއެވެ.

މި ޤާނޫނުގެ ދަށުން ގޮނޑި ގެއްލޭނީ ހަތަރު ހާލަތެއް މެދުވެރިވުމުންނެވެ. އެ ހާލަތްތަކުގެ ތެރޭގައި؛

-        އިންތިޚާބުވި ޕާޓީގެ މެމްބަރުކަމުން ވަކިކުރުން

-        އިންތިޚާބުވި ޕާޓިގެ މެމްބަރުކަމުން އަމިއްލައަށް ވަކިވުން

-        އިންތިޚާބުވި ޕާޓީ ނޫން އެހެން ޕާޓީއެއްގެ މެމްބަރަކަށްވުން

-        އަމިއްލަ ގޮތުން އިންތިޚާބުވާ މެމްބަރުން ދައުރުގެ ތެރޭ ފުރަތަމަ ގުޅޭ ޕާޓީން ވަކިކުރުން، ވަކިވުން ނުވަތަ ދެވަނަ ޕާޓީއަކަށް ސޮއިކުރުން

ނަމަވެސް ނިސްބަތްވާ ޕާޓީއިން ސުލޫކީ ފިޔަވަޅެއް އެޅުން ނުވަތަ އެ ޕާޓީގެ ވިޕްލައިނާ ހިލާފުވުން އެއީ، ޕާޓީން ވަކި ނުކުރާހާ ހިނދެއްގައި މި ގާނޫނުގެ ދަށުން ގޮނޑި ގެއްލޭނެ ހާލަތެއް ނޫން ކަމަށް ވެސް ގާނޫނުން ސާފުކޮށްދެ އެވެ.

އާ ސަރުކާރު އިންތިޚާބުވުމަށްފަހު އިދިކޮޅު އެމް.ޑީ.ޕީގެ 13 މެމްބަރުން ސަރުކާރު ހިންގާ ޕީ.އެން.ސީ އަށް ސޮއި ކުރުމާއިއެކު އެ މެމްބަރުންނަށާއި، ސަރުކާރަށް ގިނަ ބައެއްގެ ނުރުހުން އަމާޒުވެގެން ދިޔައެވެ. ކޮރަޕްޝަންގެ އެތައް ތުހުމަތުތަކެއް ޕީ.އެން.ސީގެ ރައީސަށާއި އެ މެމްބަރުންނަށް ކުރެވިގެންދިޔައެވެ.