ޕީޕަލްސް ނޭޝަނަލް ފްރޮންޓް (ޕީ.އެން.އެފް) އަކީ އައު ޕީ.ޕީ.އެމް ކަމަށް ޕީއެންއެފްގެ ސެކެޓްރީ ޖެނެރަލް މުޙައްމަދު މަލީހް ޖަމާލް ވިދާޅުވެއްޖެއެވެ.
މަލީހް މިހެން ވިދާޅުވީ ރައްޔިތުންގެ މަޖިލީހުގެ ހުރާ ދާއިރާއަށް ޕީ.އެން.އެފްގެ ޓިކެޓުގައި ވާދަކުރައްވާ އާމިނަތު ރުޢްލާ އަޙްމަދުގެ ކެމްޕޭނަށް ކ.ހުރާ އަށާއި ހިންމަފުއްޓަށް ކުރެއްވި ދަތުރުފުޅުގައި ވާހަކަދައްކަވަމުންނެވެ.
މަލީޙް އިތުރަށް ވިދާޅުވީ ރައީސް ޔާމީންގެ ސަޕޯޓަރުން ފަހަތަށް ނުޖެހޭނެ ކަމަށާއި 20 ވަނަ ރައްޔިތުންގެ މަޖިލީހުގެ އިންތިޚާބަށްފަހު އެކަން ރައީސް މުޢިއްޒު އަށާއި އަދުރޭއަށް އިހުސާސްވާނެ ކަމަށެވެ.
މަލީޙް މިހެން ވިދާޅުވެފައިވާއިރު، ސޯޝަލް މީޑިއާގައި ރައީސް ޑރ. މުޢިއްޒު ދައުލަތުގެ ފައިސާއިން އެމަނިކުފާނުގެ އަމިއްލަ އެކައުންޓަށް ގިނަ އަދަދެއްގެ ފައިސާތައް ޖަމާކުރިކަމުގެ އިންޓެލިޖެންސް ރިޕޯޓުތަކެއް ދައުރުވެފައިވެއެވެ.
ޕީ.އެން.އެފް އިން ދަނީ ރައީސް ޔާމީން މިނިވަން ކުރުމަށް ކެނޑިނޭޅި މަސައްކަތްކުރަމުންނެވެ. މިގޮތުން އެމަނިކުފާނު މިވަގުތު ގޭ ބަންދުގައި ވާއިރު، އެމަނިކުފާނަށް އިއްވާފައިވާ ޖަލު ހުކުމުން އެއްކޮށް މިނިވަން ވާނެ ދުވަހަކަށް ރައްޔިތުން ދަނީ އިންތިޒާރުކުރަމުންނެވެ.
