ފުވައްމުލަކު ދެކުނު ދާއިރާއަށް އެމްޑީޕީގެ ޓިކެޓުގައި ވާދަކުރައްވާ ކެނޑިޑޭޓު ނަޒުރާ ނަސީމްއަށް، ޕީޕަލްސް ނެޝަނަލް ފްރަންޓް، ޕީއެންއެފްއިން ތާއީދުކޮށްފި އެވެ.

ނަޒުރާއަކީ ކުރީގެ ޔޫތު މިނިސްޓަރު އަހުމަދު މަހުލޫފުގެ އަނބިކަނބަލުންނެވެ. ނަޒުރާއަށް ތާއީދު ކުރިކަން ޕީއެންއެފްގެ ސެކެޓްރީ ޖެނެރަލް މުހައްމަދު މަލީހު ޖަމާލު ވަނީ އިއުލާން ކޮށްދެއްވައިފަ އެވެ. މަލީހު ވިދާޅުވި ގޮތުގައި ޕީއެންއެފްއިން މުޅި ރާއްޖޭގައިވެސް މަސައްކަތް ކުރަމުން ދަނީ ރައީސް މުއިއްޒު ނޫން ގޮތެއް ހޯދުމަށް ކަމަށެވެ.

ފުވައްމުލަކު ދެނުނު ދާއިރާއަށް ޕީއެންއެފްއިން އެންޑޯޒްކޮށްފައިވާ އިތުރު ކެނޑިޑޭޓަކު ވާދައެއް ނުކުރެ އެވެ. އެދާއިރާއަށް ޕީއެންސީގެ ޓިކެޓުގައި ރައީސް ޑރ. މުހައްމަދު މުއިއްޒުގެ ތާއީދާއިއެކު ނިކުންނަވަނީ ރައީސް އަބްދުﷲ ޔާމީނަށް އަދާވާތްތެރިވި ދިއްގަރު ދާއިރާގެ ކުރީގެ މެމްބަރު އަހުމަދު ނާޒިމްގެ އަރިސް ބޭފުޅެކެވެ. އޭނާގެ އިތުރުން ޑިމޮކްރެޓްސްގެ ޓިކެޓުގައިވެސް އެދާއިރާއަށް ކެނޑިޑޭޓަކު ނިކުމެ އެވެ.

އެމްޑީޕީގެ ކެނޑިޑޭޓަކަށް ޕީއެންއެފްއިން ތާއީދު ކުރިއިރު ފުވައްމުލަކު އުތުރު ދާއިރާއިން ރައީސް ޔާމީންގެ ތާއީދުގައި ނިކުންނަވާ ކެނޑިޑޭޓަށް އެމްޑީޕީން ވަނީ ދާއީދު ކުރައްވައިފަ އެވެ. އެދާއިރާއަށް އެމްޑީޕީން ކެނޑިޑޭޓަކު ނުނެރެ އެވެ.

ފުވައްމުލަކަކީ ޕީއެންއެފްގެ އިސްސަފުގައި ހަރަކާތްތެރިވާ ގިނަ ބޭފުޅުންތަކެއް ނިސްބަތްވާ އެޕާޓީގެ ތާއީދު ބޮޑު ސިޓީއެކެވެ. އެގޮތުން އެ ޕާޓީ ހިންގުމުގައި އިސްކޮށް އުޅުއްވާ ޑރ. މުހައްމަދު ޖަމީލް އަހުމަދުއާއި މުހައްމަދު މަލީހު ޖަމާލުގެ އިތުރުން ކުރީގެ މަޖިލިސް މެންބަރު ޝިފާގު މުފީދުވެސް ނިސްބަތްވެވަޑައިގަންނަވަނީ ފުވައްމުލަކަށެވެ.