ރައީސް އަބްދުﷲ ޔާމީންގެ އިންތިހާބީ އެތައް ހައްގެއް ހައިކޯޓުގެ އިހުމާލުވަނީ ގެއްލިފައިކަމަށާ އަދި މިހާރުވެސް ދަނީ ގެއްލެމުންކަމަށް އެމަނިކުފާނުގެ ގާނޫނީ ޓީމުގައި ހިމެނިވަޑައިގަންނަވާ ވަކީލު، އަލްއުސްތާޛު އަލީ ޝާހު ވިދާޅުވެއްޖެއެވެ.

ޝާހު މިފަދައިން ވިދާޅުވީ، ވ. އާރަށުގެ މައްސަލައިގައި ރައީސް ޔާމީންގެ މައްޗަށް އިއްވާފައިވާ 11 އަހަރުގެ ނުހައްގު ޖަލު ހުކުމްގެ އިސްތިއުނާފް މައްސަލައިގެ ހުކުމް އިއްވުން ލަސްވާ މައްސަލައިގެ ކަންބޮޑުވުންތަކާ އެކު ހައިކޯޓަށް ވަޑައިގެންނެވުމަށް ފަހު އެމަނިކުފާނުގެ އާއިލާގެ ފަރާތުންނާ އަދި އެމަނިކުފާނު އަލަށް އުފައްދަވަން މަސައްކަތްޕުޅު ކުރައްވަމުން ގެންދަވާ ޕާޓީގެ އިސްކޮށް ހަރަކާތްތެރިވާ ބޭފުޅުން ދެއްވި އިންޓަރވިއުގައެވެ.

ޝާހު ވިދާޅުވީ ރައީސް ޔާމީންއަށް އިންސާފު ނުލިބި ލަސްވާ ލަސްވުމާ މެދު ނުހަނު ކަންބޮޑުވުންތައް އެބަ ހުރި ކަމަށެވެ. އެންމެ ބޮޑު ކަންބޮޑުވުމަކީ އެމަނިކުފާނަކީ ދިވެހި ރައްޔިތަކަށްވީ ހިނދު ގާނޫނު އަސާސީއިން ބަޔާންކޮށްފައިވާ އަސާސީ ހައްގުތައް ވެސް އެމަނިކުފާނަށް ލިބުން ދަތިވުން ކަމަށާ އެ ދަތިތައް ކުރިމަތިވަމުން ދަނީ ހައިކޯޓުން ހުކުމްކުރުން ލަސްކޮށް، އިހުމާލުވަމުންދާތީ ކަމަށެވެ.

ރައީސް ޔާމީންއަކި އާދައިގެ ބޭފުޅެއް ނޫން ކަމަށާ އެމަނިކުފާނަކީ ގައުމުގައި ރައީސްކަން ކުރައްވާފައި ހުންނެވި އިއްޒަތްތެރިއަކަށްވާއިރު އެމަނިކުފާނުގެ މައްސަލައެއް ލަސްވެ އިންސާފު ލިބުން ލަސްވުމަކީ މުޅި ނިޒާމަށްވެސް ލިބޭ ހުތުރެއްކަން ފާހަގަކުރައްވާ ޝާހު ވިދާޅުވި، ރައީސް ޔާމީންގެ މައްސަލައިގައި ޖަވާބު ހޯދަން ހައިކޯޓަށް ދިއުމުން ލިބެނީ އެއް ޖަވާބެއް ކަމަށާ އެ ޖަވާބު އެއީ ބަލައިގަންނަން އުނދަގޫ ޖަވާބެއް ކަމަށް ޝާހު ވިދާޅުވިއެވެ.

ރައީސް ޔާމީންގެ ހުކުމުގެ އަޑު އެހުން ތާވަލްނުކޮށް ލަސްކުރަމުންދާއިރު މީގެ ކުރިން ވެސް އެކަން ސާފުކުރަން ހައި ކޯޓަށް ރައީސް ޔާމީންގެ ޓީމުން ގޮސްފައި ވެއެވެ. އެއިން ކޮންމެ ފަހަރަކު ވެސް ހައި ކޯޓުން ދޭ ޖަވަބަކީ ވީހާ ވެސް އަވަހަށް ހުކުމް ކުރަން މަސައްކަތް ކުރަމުން އަންނަ ކަމަށެވެ. ނަމަވެސް ހުކުމާ ހަމައަށް ވާސިލްވެ 2 މަސް ދުވަސް ފައިތުވާން ކައިރިވެފައިވާއިރު ހުކުމުގެ މަޖިލިސް ތާވަލްނުކުރުމަކީ އެއީ ގާނޫނީ ގޮތުން ދެރަވަރު ކަމެއްގެ ގޮތުގައި ގާނޫނީ ފަންނުގެ ގިނަ ބޭފުޅުން ފާހަގަކުރައްވައެވެ.