ރައީސް އޮފީހުގައި ބާއްވާ އެއްވެސް ނޫސްވެރިންގެ ބައްދަލުވުމަކަށް ފޯނު ވެއްދުން ނޫސްވެެރިންނަށް މަނާކޮށްފިއެވެ.

މިހެން މިކަން ހާމަކޮށްފައިވަނީ ތިން މަހަށްވުރެ ގިނަ ދުވަސް ނޫސްވެރިންނާ ބައްދަލުނުކޮށް ތިއްބެވުމަށް ފަހު ރައީސް އޮފީހުން މިއަދު ބޭއްވި ނޫސްވެރިންނާ ބައްދަލުވުމަށް ދިޔަ ނޫސްވެރިންނަށެވެ.

ރައީސް އޮފީހުން ހާމަކޮށްފައިވާ ގޮތުގައި ނޫސްވެރިންނަށް ޕްރެސް ރޫމަށް ފޯނު ވެއްދުން މަނާކުރީ، ސަލާމަތީ ސަބަބުތަކަކަށެވެ. މިހާރު ސެކިއުރިޓީ ޕްރޮޓޮކޯލް އޮންނަނީ، އެ އޮފީހުގެ ބައްދަލުވުންތަކަށް އަންނަ އެއްވެސް މީހަކަށް ފޯނު ނުވެއްދޭ ގޮތަށް ކަމަށް ވެސް އެ އޮފީހުން ވަނީ ބުނެފައެވެ.

މިއަދު ޕްރެސް ކޮންފަރެންސަށް ދިޔަ ނޫސްވެރިން ވަނީ ފޯނު ވެއްދުމަށް މަނާ ކުރުމުން އެކަމާ ދެކޮޅު ހަދާފައެވެ. އަދި ދުރާލާ އެ އެންގުން އަންގާފައި ނުވާތީ ރައީސް އޮފީހުންވެސް އެ ފުރުސަތު މިއަދަށް ދިނެވެ. ނަމަވެސް މީގެ ފަހުން ފޯނު ނުވެއްދޭނެ ކަމަށް ވަނީ އަންގާފައެވެ.

މިއީ މިފަދަ އެންގުމެއް ދިވެހި ސަރުކާރަކުން ނޫސްވެރިންނަށް އެންގި ފުރަތަމަ ފަހަރެވެ. ފޯނަކީ ނޫސްވެރިންގެ ބައްދަލވުމުންތަކުގައި އެ ނޫސްވެރިންނަށް ވަރަށް މުހިއްމު އާލާތަކަށްވާއިރު އެ ފަދަ ހުރަސް އެޅުމެއް، ނޫސްވެރިންނާ ވަރަށް ގާތުން މަސައްކަތްކުރާނެ ކަމަށް ބުނެ އައި ސަރުކާރުން އެޅުމަކީ ނާތަހުޒީބު ކަމެއްގެ ގޮތުގައި ގިނަ ބަޔަކު ގެންދަނީ ސިފަ ކުރަމުންނެވެ.