20 ވަނަ ރައްޔިތުންގެ މަޖިލީހުގެ އިންތިހާބު ކާމިޔާބު ކުރެއްވި ސަރުކާރުގެ ކެންޑިޑޭޓުން އުފާފާޅުކުމުގެ ގޮތުން ހަވާ އެރުވުމަށް މިހާތަނަށް 800،000ރ. އަށް ވުރެ ބޮޑު ހޭދައެއް ކޮށްފައިވާކަން ހާމަވެެއްޖެއެވެ.

ޗެނަލް 13 އަށް މައުލޫމާތު ލިބުނުގޮތުގައި ސަރުކާރުގެ ކެންޑިޑޭޓުން ހަވާ އަރުވަމުން ގެންދަވަނީ ދައުލަތުގެ ފައިސާއިންނެވެ.

މިވާހަކަ ޗެނަލް 13 އިން ޝާއިއު ކުރުމާއި ގުޅިގެން ސަރުކާރު ވަނީ ޑިފެންސަށް ނިކުމެ އެކަން ކުރަނީ ކެންޑިޑޭޓުންގެ އަމިއްލަ ހަރަދުގައި ކަމަށް ވިދާޅުވެފައެވެ.

ނަމަވެސް ސަރުކާރުގެ އިސް އޮފިޝަލެއް މައުލޫމާތު ދިން ގޮތުގައި ސަރުކާރުން ވަނީ މި ކެންޑިޑޭޓުންނަށް އުފާފާޅުކުރުމަށް ބަޖެޓް ދެެއްވާފައެވެ.

މައުލޫމާތު ލިބުނުގޮތުގައި މިހާތަނަށް 20 ވުުރެ ގިނަ ދާއިރާ އަކުން ވަނީ ހަވާ އަރުވާ އިންތިޚާބުގައި ލިބުނު ކާމިޔާބީ ފާހަގަކޮށްފައެވެ.

މިކަމާ ގުޅިގެން ރައީސް އޮފީހުގެ ތަރުޖަމާނު ހީނާ ވަލީދާ ނޫސްވެރިޔަކު ވަނީ އިއްޔެ ބޭއްވުނު ނޫސްވެރިންގެ ބައްދަލުވުމުގައި ސުވާލު ކުރައްވާފައެވެ.

ހީނާ ވަނީ އެހެން ސަރުކާރުގެ ފަރާތްތަކެކޭ އެއްފަދައިން އިތުރުފުޅު ހައްދަވާ އެއީ ސަރުކާރުން ކުރާ ކަމެއް ނޫންކަމަށް ވިދާޅުވެފައެވެ.