މި ހަފްތާ ފެށިގެން މިދިޔައީވެސް ވަރަށް ފޯރިގަދަކަމާއެކުގައެވެ. ހުރިހާ ނޫސްތަކެއްގެ މައިގަނޑު ސުރުހީއެއް ގެ ގޮތެއްގައި އޮތީ "ނޫސްވެރިން" މި ލަފްޒެވެ. ސަރުކާރުން ފެށި ކުޅި އަދިވެސް މިއޮތީ ވަރަށް މަޖާ ކުޅިވަރެއްގެ ގޮތުގައެވެ. ރައީސް އޮފީހުގައި ބޭއްވޭ ނޫސްވެރިންގެ ބައްދަލުވުންތަކަށް ދާއިރު ނޫސްވެރިންނަށް ފޯނު ނުވެއްދޭނެ ކަމަށް ރައީސް އޮފީހުން ނިންމުމާއި ގުޅިގެން ނޫަސްވެރިން ފެށީ އެމީހުންގެ މަސައްކަތައް ބުރޫއަރާނެ ފަދަ އެއްވެސް ކަމެއް ނުކުރުމަށް ގޮވާލުމަށެެވެ. ނޫސްވެރިންގެ މި އަޑު ރަނގަޅަށް ނުކެނޑި އުޅެނިކޮށް ދެން މި ފެނުނީ އިތުރުކަމެއް ވެސް ފަށައިގެން އުޅޭ މަންޒަރެވެ.

ސަރުކާރު ޖަވާބުދާރީ ކުރުމަށްޓަކައި މަސައްްކަތް ކުރަމުންގެންދާ ޓީވީ ސްޓޭޝަންތަކަށް ރޯމާ ދުވާ އިންޒާރުދެމުން ގެންދާ މަންޒަރެވެ. މިކަމަށް އެއްޗެއް ބުނާނެ މީހެއް ސަރުކާރުގެ އިސް ފަޑީގައި ނެތެވެ. ނުވެސް ބުނާނެތާއެވެ. އާންމު ރައްޔިތުންނަށް މިކަން ކަން ކުރަން ހިތްވަރު ދެނީ ސަރުކާރުގެ އިސް އޮފިޝަލުންނެވެ.

ސަރުކާރުން ހިންގާ ޖަރީމާތައް ރައްްޔިތުންނާ ހަމަޔަށް ފޯރުކޮށްދޭ ޓީވީ ސްޓޭޝަންތަކަކީ "ފިތުނަ" ޓީވީ ސްޓޭޝަންތަކެއް ކަމަށް ސަރުކާރުގެ ވެރިން އެބަ ވިދާޅުވައެވެ. މިއަޑު އިވުމުން ދެލޮލުގައި ފޮތި ކޮޅު އައްސާލާފައި އާންމުން ވެސް ގަބޫލު ކުރަނީ އެއްކަލަ ސަރުކާރުގެ ވެރިން ހަދާހާ ދޮގުތަކެވެ. މިއީ މިހާރު ރާއްޖޭގައި ކަންކަން އޮންނަ ގޮތެވެ.

މީޑިޔާތަކާ އެންމެ ގާތުން މަސައްކަތް ކުރައްވާނެ ކަމުގެ ޔަގީންކަން ދެއްވި ވެރިޔާގެ ވެރިކަމަށް އަދި މާ ގިނަ ދުވަސްތަކެެއްނުވެއެވެ. ފެނިގެންދަނީ އެމަނިކުފާނުގެ ބަހާ އަަމަލާ އެއްވެސް ވަރަކަށް ދިމާނުވާ މަންޒަރެވެ. ވެރިކަމަށް އައިތާ މަހެެއް ރަނގަޅަށް ނުވަނީހެން ވެރިކަމަށް ފާޑުކިޔާ ހަބަރު ޝާއިއު ކުރަން ފެށި ދެ ނޫހެއް ބްލޮކް ވެސް ވަނީ ކޮށްފައެވެ. ކުރިޔަށް ދާނީ ފާޑުކިޔުންތައް ވެސް ބަލައިގަނެގެން ކަމަށް ވިދާޅުވި ވެރިޔާ އަށް ފާޑުކިޔުންތަކާ ކުރިމަތިލާން ކެރިވަޑައިނުގަތީއެވެ.

އެއްވެސް މީޑިޔާއެއް ބާކީ ނުކުރައްވާނެ ކަމަށް ވިދާޅުވިއިރު ފެނިގެންދަނީ ސަނާ ކިޔާ މީޑިޔާތައް ކިހިލި ޖަހާލައިގެން އުޅޭ މަންޒަރެވެ.

އިއްޔެ އަޑުއިވިގެންދިޔައީ ރާއްޖެ ޓީވީ ގެ ނޫސްވެރިޔާގެ ސޯޝަލް މީޑިޔާގެ ޕޯސްޓަކަށް އެ ޓީވީ ސްޓޭޝަން ރޯކޮށްލާނެ ކަމުގެ އިންޒާރު ދިން ވާހަކައެވެ. އެ ވާހަކަ ޗެނަލް 13 އިން ޝާއިއު ކުރުމާއެކު އެންމެ ފުރަތަމަ ރޯކޮށްލަންވީ ޗެނަލް 13 ގައި ކަމަށް ބައެއް ފަރާތްތަކުން ދަނީ ބުނަމުންނެވެ. އެގޮތުން ޗެނަލް 13 ގެ ފޭސްބުކް ގައި ކޮމެންޓްކޮށް ބިރުދައްކާފައިވާ ފަރާތްތައް ގިނައެވެ. މިކަމާ ދެކޮޅަށް އަޑު އުފުލާނެ ސަރުކާރުގެ ވެރިންނެއް ނެތެވެ.

އެވެރިން ރަނގަޅަށްވިއްޔާ ތިބޭނީ ދުފާލައިގެން، އަތް ޖަހަންށެވެ. ސަރުކާރު ޖަވާބުދާރީ ކުރުވުމުގައި އުޅޭ ޓީވީ ސްޓޭޝަންތައް ނައްތާލަން ސަރުކާރުގެ އިސްވެރިން ބޭނުންވަނީތާއެވެ. އެހެން ނޫންނަމަ މި ކަންތައް ކުޑަ ކުޑަ ކަމެއްގެ ގޮތުގައި ނުނަންގަވާނެ ކަން ޔަގީނެވެ.

މިއަދު މީޑިޔާތަކަށް ބިރުދެއްކުން މިއޮތީ އާންމު ކަމަކަށްވެފައެވެ.