ޣައްޒާގައި މުވާސަލާތީ ވަސީލަތްތަކުގެ ހިދުމަތް މެދުކަނޑާލިތާ 5 ދުވަސް ވެގެންގޮއްސި ކަމަށް އެ ސަރަހައްދުގައި ހަރަކާތްތެރިވަމުން އަންނަ ނޫސްވެރިން ހާމަކޮށްފިއެވެ.

މިއީ 2023 ވަނަ އަހަރުގެ އޮކްޓޯބަރު މަހުގެ ހަތް ވަނަ ދުވަހު ޣައްޒާއިން މުވާސަލާތު މުޅިން ކަނޑާލިތާ މަދުވެގެން ހަތް ވަނަ ފަހަރެވެ. ނެޓުވޯކު ޓަވަރުތަކަށް ހަމަލާދނުމުގެ ސަބަބުންނާއި، ތެޔޮ ނުލިބުމުން އަދި ނެޓްވޯކަށް ޕްރެޝަރު ކުރުމާއި ދާއިރާގެ އެކި ހިސާބުތަކުގައި ޓްރާންސްމިޝަން ދަށްވުމުން މިހާރު މުޅި ޣައްޒާއިން ވަނީ މުވާސަލާތީ ހިދުތަމް ކެނޑިފައިއެވެ.

މިހާތަނަށް އިސްރާއީލުން ފަަލަސްތީނަށް ދެމުން އަންނަ ހަމަލާތަކުގައި މަދުވެގެން 60،317 މީހުންނަށް އަނިޔާވެފައިވާއިރު، ގިނަ ބަޔަކު ޒަޚަމްތަކަށް ފަރުވާ ދިނުމަށް ސިއްހީ ފަރުވާ ނުވަތަ ބޭސް ހޯދުމަށް އުނދަގޫތަކެއް ކުރިމަތިވެ އެވެ.

އިސްރާއިލުން ދެމުން އަންނަ ހަމަލާތަކަށް މަޑުޖެހުމެއް އައިސްފައި ނުވާއިރު މި ހަމަލާތަކުގެ ސަބަބުން ފަލަސްތީނުގެ ޣައްޒާގައި ހުންނަ ގިނަ އިމާރާތްތައް ސުންނާފަތިވެ ރައްޔިތުން ވަނީ މަގުމަތިވެފައިއެވެ.

އަދި ބޭސްފަރުވާ އާއި ސާފުބޯފެން ނުލިބުމުގެ ސަބަބުން އެގައުމުގެ ރައްޔިތުންގެ ތެރޭގައި އެކި ކަހަލަ ބަލިމަޑުކަން ދަނީ ފެތުރެމުންނެވެ.

ކާބޯތަކެތި ނުލިބުމުގެ ސަބަބުން ފަލަސްތީނުގެ ރައްޔިތުން ވަނީ ބަނޑައްޖެހިފައި ކަމަށްވެސް އެ ގައުމުގެ ހެލްތު މިނިސްޓްރީއިން ވަނީ ބުނެފައިއެވެ.

އޮކްޓޯބަރު މަހުގެ 7 ވަނަ ދުވަހުން އިސްރާއިލުން ފަލަސްތީނަށް ދެމުން އަންނަ ހަމަލާތަކުގައި ޝަހީދުވި މީހުންގެ އަދަދު 24،000 ވަނީ ވުރެން މައްޗަށްގޮސްފައިއެވެ.