މާލޭގައި ހަރަކާތްތެރިވާ ނުރައްކާތެރި ގޭންގް ގުރޫޕްއަކުން ހަމަލާދީ އަނިޔާވެރި ގޮތަކަށް މަރާލައިފައިވާ މުހައްމަދު އަނަސްގެ މަރުގެ މައްސަލައިގައި ދައުވާ ލިބުނު ހުރިހާ އެންމެން ސަލާމަތްވި މައްސަލަ އިސްތިއުނާފު ކުރަން ދައުލަތުން ހައި ކޯޓަށް ހުށަހަޅައިފިއެވެ.

2017 ވަނަ އަހަރު، ލިޓަސް ސާވިސް ސެންޓަރު ތެރޭގައި ހިންގި މި މާރާމާރީގައި ދައުލަތުން ދައުވާ ކޮށްފައިވަނީ ލ. ގަން ތުނޑީ ނަންނާރިގޭ ޖުނައިހް އަބްދުﷲ އާއި ދަފްތަރު ނަމްބަރު 1746 ސިމާހް މޫސާ އާއި ސ. ފޭދޫ ވެސްޓަންވިލާ ހަސަން މަހްފޫޒްގެ އިތުރުން ތ. ކިނބިދޫ ގުލްފާމްގޭ މުހައްމަދު ޝާޒާއި ޅ. ކުރެންދޫ އަސުރުމާގޭ މުހައްމަދު ޒަޔާނާއި މ. ލޮނުމިދިލިގޭ އަފްރާހު އަބްދުއްރައްޒާގާއި މ. ދިމިޝްގު އުސްމާން ޝަރީފްގެ މައްޗަށެވެ.

އަނަސްގެ މަރާ ގުޅިގެން ދައުލަތުން ދައުވާކުރި މީހުންގެ ތެރެއިން މިހާތަނަށް ކުށް ސާބިތުވީ އެކަމުގައި ބައިވެރިވި 17 އަހަރުގެ ކުއްޖެއްގެ މައްޗަށެވެ. އޭނާގެ މައްޗަށް 18 އަހަރުގެ ޖަލު ހުކުމެއް ހައި ކޯޓުން މިދިޔަ އަހަރު ވަނީ އިއްވައިފަ އެވެ.