އޮކްޓޯބަރު ހަތް ވަނަ ދުވަހު އިސްރާއީލުން ފަލަސްތީނަށް ދިން ހަމަލާ ތަހުގީގު ކުރަމުންދާ އދ. ގެ ގްރޫޕަކާ މެޑިކަލް ސްޓާފުން ވާހަކަ ދެއްކުން އިސްރާއީލުން މަނާކޮށްފިއެވެ.

އިސްރާއީލުގެ ހެލްތު މިނިސްޓްރީން ވަނީ ޑޮކްޓަރުންނާއި ސިއްހީ މުވައްޒަފުން، ފަލަސްތީނުގައި ހަރަކާތްތެރިވަމުން އަންނަ، "އިންޑެޕެންޑެންޓް އިންޓާނޭޝަނަލް ކޮމިޝަން އޮފް އިންކުއަރީ އޮން ދަ އޮކިއުޕައިޑް ޕަލެސްޓިނިއަން ޓެރެޓޮރީ" އަށް އެއްބާރުލުން ނުދިނުމަށް އަންގާފައިއެވެ.

އިސްރާއީލުގެ ކަމާބެހޭ ފަރާތްތަކުން ބުނާ ގޮތުގައި 2021 ވަނަ އަހަރު އދ. އެކުލަވާލާފައިވާ ކޮމިޝަން އޮފް އިންކުއަރީ އެއީ ވަކި ކޮޅަކަށް ތާއީދުކުރާ ކޮރަޕްޓުވެފައިވާ ކޮމިޝަނެއް ކަމަށެވެ.

ނަމަވެސް އިސްރާއީލުން މިފަދަ ފިއްތުންތައް ކުރިމަތި ކުރުވުމުގެ މައިގަނޑު ސަބަބަކީ އެ ކޮމިޝަނުގެ ތަހުގީގުގެ ހޯދުންތައް ޖޫން މަހު ކައުންސިލަށް ހުށަހެޅުމާއި އޮކްޓޯބަރު މަހު އދ. ގެ އާންމު މަޖިލީހުގައި މި ހޯދުންތަށް ހުށަހެޅިގެން ދާނެތީއެވެ.

އިސްރާއީލުން ފަލަސްތީނަށް ދެމުން އަންނަ ހަމަލާތަކަށް އެއްވެސް މަޑުޖެހުމެއް އައިސްފައި ނުވާއިރު، ބޭސްފަރުވާ އާއި ސާފުބޯފެން ނުލިބުމުގެ ސަބަބުން އެގައުމުގެ ރައްޔިތުންގެ ތެރޭގައި އެކި ކަހަލަ ބަލިމަޑުކަން ދަނީ ފެތުރެމުންނެވެ.

މީގެ އިތުރުން ކާބޯތަކެތި ނުލިބުމުގެ ސަބަބުން ފަލަސްތީނުގެ ރައްޔިތުން ވަނީ ބަނޑައްޖެހިފައި ކަމަށްވެސް އެ ގައުމުގެ ހެލްތު މިނިސްޓްރީއިން ވަނީ ބުނެފައިއެވެ.

އޮކްޓޯބަރު މަހުގެ 7 ވަނަ ދުވަހުން އިސްރާއިލުން ފަލަސްތީނަށް ދެމުން އަންނަ ހަމަލާތަކުގައި ޝަހީދުވި މީހުންގެ އަދަދު 24،000 ވަނީ ވުރެން މައްޗަށްގޮސްފައިއެވެ.