ދިވެހިރާއްޖޭގައި ގާއިމުވެ ތިބި އިންޑިއާ ސިފައިން އަނބުރާ ގެންދިއުމަށް ފަހު އެ އަދަދަށް އެގައުމުން މަދަނީ މީހުން ފޮނުވާކަން ހާމަވެއްޖެއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ދެންނެވި ސުވާލަށް ޖަވާބު ދެއްވަމުން ޚާރިޖީ ވަޒީރު މޫސާ ޒަމީރު ވިދާޅުވީ، ފޮރިން މިނިސްޓަރު މޫސާ ޒަމީރު ވިދާޅުވީ އިންޑިއާ ސިފައިން ތިބީ ހަނިމާދުއާއި ކައްދު އާއި ގަމުގައި ކަމަށެވެ. އެގޮތުން ހަތެއް މާޗުގައި އާއި ނުވައެއް މާޗުގައި ގަމުން 26 ސިފައިންނާއި އޭޕްރިލް މަހުގެ ހަތަކާއި ނުވައެއްގައި ހަނިމާދުއިން 25 ސިފައިން ފޭބި ކަމަށް އޭނާ ވިދާޅުވިއެވެ.

އެއަށްފަހު އެންމެ ފަހު ސިފައިންގެ ބެޗު ފޭބީ ކައްދުއިން ކަމަށާއި އޭގެ ތެރޭގައި ހިމެނެނީ މިދިޔަ އަންގާރަ ދުވަހު ފޭބި 12 ސިފައިންނާއި ބުރާސްފަތި ދުވަހު ފޭބި 13 ސިފައިން ކަމަށް ޒަމީރު ވިދާޅުވިއެވެ.

އިންޑިއާއިން ރާއްޖެއަށް ހަދިޔާކުރި ޑޯނިއާ ހެލިކޮޕްޓަރުތައް އޮޕަރޭޓް ކުރުމަށް 76 މަދަނީން އިންޑިއާއިން ގެނެސްފައިވާއިރު ސަރުކާރުން ބުނީ އެ މީހުންނަކީ އެ ހެލިކޮޕްޓަރުތައް އުފެއްދި ކުންފުނި ކަމަށްވާ ހިންދުސްތާން އެރޮނޮޓިކްސް ލިމިޓެޑްގެ މީހުން ކަމަށެވެ. ނަމަވެސް އެއީ ސީދާ އެ ގައުމުގެ ސަރުކާރުން ހިންގާ ކުންފުންޏެއްކަން ވަނީ ހާމަވެފައެވެ.