އެެއްވެސް ކެބިނެޓެއްގެ ވަޒީރެއްގެ ގޮތުގައި އަދުގެ ޓުއަރިޒަމް މިނިސްޓާރ އިބްރާހިމް ފައިސަލް ހުންނެވުމަކީ ބަދުނާމެެއް ކަމަށް ޕީއެންއެފްގެ ސެނެޓް މެމްބަރ ޑރ މުހައްމަދު ޖަމީލް އަހުމަދު ވިދާޅުވެއްޖެއެވެ.

ޑރ ޖަމީލް މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.

އެގޮތުން އެމަނިކުފާނު ވިދާޅުވީ ފައިސަލްގެ "ޖާހިލު" ކަމުން ހައިރާންވެފައި ހުންނެވި ކަމަށެވެ.

ކުރީގެ ރައީސް އިބްރާހިމް މުހައްމަދު ޞާލިހުގެ 5 އަހަރު ދުވަހު ފައިސަލް ކޮބައިތޯ ވެސް ޑރ ޖަމީލް ވަނީ ސުވާލު އުފައްދަވާފައެވެ.

ޑރ ޖަމީލު ވިދާޅުވީ ކޮންމެ އައު ސަރުކާރަކާއިއެކު ފައިސަލް ފާޅުވާ ފާޅުވުމުން އެތައް ވާހަކައެއް ބުނެދޭ ކަމަށެވެ.

އޭގެއިތުރުން ޑރ ޖަމީލް ވިދާޅުވީ އެއްވެސް ކެބިނެޓެއްގައި ވަޒީރެއްގެ ގޮތުގައި ފައިސަލް ހުންނެވުމަކީ ބަދުނާމެއް ކަމަށެވެ.

އެއްވެސް ވަރަކަށް ސިއްރުކުރުމެއް ނެތި ފައިސަލްގެ ވާހަކަތައް ދަންނަވަން ޖެހޭތީ މައާފަށް އެދޭކަމަށްވެސް ޑރ ޖަމީލް ވަނީ ޕޯސްޓްގައި ފާހަގަކުރައްވާފައެވެ.

ރައީސް މުއިއްޒުގެ ހާއްސަ މުޝީރު އަދި ފޮނަދޫ ދާއިރާގެ އިންތިޚާބީ މެމްބަރު އަބްދުއްރަހީމްގެ ދަރިކަލުން ކަމަށްވާ ޓޫރިޒަމް މިނިސްޓާރ ފައިސަލް އަންނަނީ ބޭރުގެ ގައުމުތަކަށް ވަޑައިގެން އިނގިރޭސި ބަހުން ވާހަކަ ދައްކަން ނޭނގި، ރާއްޖެ ލަދެއްގައި ބައްދަމުންނެވެ.

ފައިސަލްގެ މި އަމަލުގެ ސަބަބުން ގިނަ ބަޔަކު އަންނަނީ ރައީސް މުއިއްޒަށް ފާޑުކިޔަމުންނެވެ.

ސަބަބަކީ އިލްމީ ގާބިލް ބޭފުޅުން ކެބިނެޓަށް އައްޔަން ކުރައްވާނެ ކަމަށް ރައީސް މުއިއްޒު ރިޔާސީ އިންތިޚާބުގެ ކެމްޕެއިން ދުވަސްވަރު ވިދާޅުވެ، އެފަދައިން އެކަން ނުކުރައްވާ ފައިސަލް ފަދަ ނާގާބިލް ބޭފުން ކެބިނެޓްގައި ހިމެނުމުންނެވެ.