އިސްރާއިލުން ފަލަސްތީނުގެ މުސްލިމުންނަށް ދެމުންގެންދާ ލާއިންސާނީ އަނިޔާތަށް މިހާރުން މިހާރަށް ހުއްޓާލުމަށް ގޮވާލާ އަދި ބައިނަލްއަގްވާމީ ޖިނާއީ ކޯޓު (އައިސީސީ)އިން އިސްރާއިލާއިމެދު ފިޔަވަޅު އެޅުމަށް ރާއްޖޭން ގޮވާލާއިފިއެވެ.
މިފަދައިން ވިދާޅުވެފައިވަނީ އެކްސްގައި ރާއްޖޭގެ ރައީސުލްޖުމްހޫރިއްޔާ ޑރ މުހައްމަދު މުއިއްޒު ކުރެއްވި ޕޯސްޓެއްގައެވެ.
އެގޮތުން އެ ޕޯސްޓްގައި ރައީސް ވިދާޅުވީ، މިހާރު ޣައްޒާގައި، އަދި ހާއްސަކޮށް ރަފާގައި ފެންނަމުންދާ މަންޒަރަކީ މަރުތައް އިތުރުވެ، ގިނަ ބަޔަކު ގެދޮރު ދޫކޮށްދާ މަންޒަރު ކަމަށެވެ. އެ މަންޒަރު ބަލަން ބައިނަލްއަގްވާމީ މުޖުތަމައު ހިމޭނުން ނުތިބޭނެ ކަމަށް އެމަނިކުފާނު ވިދާޅުވިއެވެ.
އަދި އިސްރާއިލްގެ އަތްދަށުވެ ޣައްޒާ ފަނާވެގެން ދާތަން ބަލަން ނުތިބޭނެ ކަމަށް ވެސް ރައީސް މުއިއްޒު ވަނީ ވިދާޅުވެފައެވެ.
އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ނަސްލު ނައްތާލުމުގެ އަމަލުތައް ހިންގާ ކަމަށް ތުހުމަތުކުރާ ދެކުނު އެފްރިކާއިން މިހާރު ކުރިއަށްދާ މައްސަލައިގައި ޖެނުއަރީ މަހު އެ ކޯޓުން ވަނީ ނަސްލު ނައްތާލުމުގެ މުއާހަދާގެ ދަށުން ހިނގާ އެއްވެސް އަމަލަކުން ދުރުހެލިވުމަށް އިސްރާއިލަށް އަމުރުކޮށްފައެވެ.
ފަލަސްތީނުގެ ރައްޔިތުންނަށް ދެމުންދާ އަނިޔާތައް ހުއްޓާލުމަށް ރާއްޖޭގެ ފަރާތުން އަންނަނީ އަބަދުވެސް ގޮވާލަމުންނެވެ.
