މިދިޔަ އަހަރު އޮކްޓޯބަރު މަހުގެ 7 ވަނަ ދުވަހުން ފެށިގެން ފަލަސްތީނުގެ ޣައްޒާގައި ޔަހޫދީން ހިންގަމުންދާ ލާއިންސާނީ އަމަލުތަކުގައި 4000 އަށްވުރެ ގިނަ ސްކޫލް ދަރިވަރުން ޝަހީދުކޮށްލައިފިއެވެ.


ފަލަސްތީނުގެ އެޑިއުކޭޝަން މިނިސްޓްރީން ބުނީ މިދިޔަ އޮކްޓޯބަރު މަހުގެ ހަތް ވަނަ ދުވަހު އިސްރާއީލުން ޣައްޒާއަށް ހަމަލާދޭން ފެށި ފަހުން ހިފާފައިވާ ސަރަހައްދުތަކުގައި ފަލަސްތީނުގެ 4،368 ދަރިވަރުން ޝަހީދުވެފައިވާ ކަމަށެވެ.

އެ މިނިސްޓްރީން ނެރުނު ބަޔާނެއްގައި ބުނެފައިވަނީ ފާއިތުވި ތިން މަހާއި ބައިގެ ތެރޭގައި ޣައްޒާގައި ޝަހީދުވި ދަރިވަރުންގެ އަދަދު 4،327 އަށް އަރާއިރު، އިސްރާއީލުގެ ހަމަލާތަކުގައި އިތުރު 7،819 ސްކޫލް ކުދިން ޒަހަމްވެފައިވާ ކަމަށެވެ.

ހިފާފައިވާ ހުޅަނގު އައްސޭރީގައި ނިރުބަވެރިން ހިންގަމުންދާ އޮޕަރޭޝަންތަކުގައި 41 ދަރިވަރުން ޝަހީދުވެ، 282 މީހުން ޒަހަމްވި ކަމަށްވެސް ބުނެފައި ވެއެވެ. އެ މުއްދަތުގެ ތެރޭގައި އިސްރާއީލުބް ވަނީ 85 ދަރިވަރަކު ހައްޔަރުކޮށްފައެވެ.

އަދި މި މުއްދަތުގެ ތެރޭގައި ޣައްޒާގައި 231 ޓީޗަރުންނާއި އެޑްމިނިސްޓްރޭޓަރުން ޝަހީދުވެ، 756 މީހުން ޒަހަމްވި ކަމަށްވެސް ބުނެފައި ވެއެވެ.

އެ މިނިސްޓްރީން ބުނީ ޣައްޒާގައި އިސްރާއީލުން ބޮން އެޅުމުގެ ސަބަބުން 83 ސްކޫލަކަށް ބޮޑެތި ގެއްލުންތަކެއް ލިބި، ހަތް ސްކޫލަކަށް މުޅިން ހަލާކުވެފައިވާ ކަމަށެވެ.