ސަރުކާރު ތެރޭގައި އޮތީ ކަންކަން އިސްލާހް ކުރުމުގެ ބަދަލުގައި، ވެރިން ރުއްސުން ކަމަށް ޕީއެންއެފްގެ ސެކެޓްރީ ޖެނެރަލް މުހައްމަދު މަލީހް ޖަމާލް ވިދާޅުވެއްޖެއެވެ.
މަލީހް މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައިއެވެ.
އެގޮތުން މަލީހް ވިދާޅުވީ ދިވެހި ސަރުކާރުގެ ގިނަ މުއައްސަސާތަކުގައި އަދިވެސް އޮތީ ކަންކަން އިސްލާހުކޮށް ރަނގަޅުކުރުމުގެ ބަދަލުގައި ވެރިން ރުއްސުމާ ދާއިމަށް ވަޒީފާގައި ހޫނުނުކާ ތިބުމުގެ ދެރަ ވިސްނުން ކަަމަށެވެ.
ރާއްޖޭގައި ހައްލުނުވެ ހުރި ކަންކަން ރަނގަޅު ކުރެވޭނީ ކަޅަށް ކަޅޭ ހުދަށް ހުދޭ ހޮޅިއަަށް ހޮޅިއޭ ބުނެގެން ކަމަށް ވިދާޅުވެ މަލީހް ވަނީ ޕޯސްޓްގައި ކަންބޮޑުވުންފާޅުކޮށްފައެވެ.
މަލީހް މިފަދައިން ވިދާޅުވެފައިވާއިރު މި ސަރުކާރަކީ އިދިކޮޅުގައި އޮވެ، ކުރީ ސަރުކާރުން ރާއްޖޭގެ ހާލަތު ރަނގަޅު ނުކޮށްގެން އެކަމަށް އެންމެ ބޮޑަށް ފާޑުކިޔަމުން އައި ބަޔެކެވެ.
އެކަންކަން ރަނގަޅު ކުރާނެ ކަމުގެ އުންމީދު ރައްޔިތުންނަށް ދިނުމަށްފަހު ވެރިކަން ހޯދި އިރު، ވެރިކަމަށް 6 މަސް ވަނީ ފުރިފައެވެ.
އިސްލާހު ކުރެވުނު ކަމެއް ނެތްއިރު، އިސްލާހްކުރާނެ ކަންކަން ވެސް ސަރުކާރަށް ބުނެނުދެވޭ ކަން ފާހަގަކޮށްލެވެއެވެ.
މިކަމާ ގިނަ ފަރާތްތަކުން އަންނަނީ ސޯޝަލް މީޑިޔާގައި ސަރުކާރަށް ފާޑުކިޔަމުންނެވެ.
