މިނިސްޓްރީ އޮފް ޔޫތް އެމްޕަވާމަންޓް އިންފޮމޭޝަން އެންޑް އާޓްސް އިން މާލޭގައި ކަރޯކޭ ނައިޓެއް ބާއްވަން ނިންމެވުމާއި ގުޅިގެން ގިނަ ބަޔެއްގެ ފާޑުކިޔުން ސަރުކާރަށް އަމާޒުވެއްޖެއެވެ.

ނިމިދިޔަ 5 އަހަރުގެ ވެރިކަމުގައި އިސްލާމްދީނަށް ތައުހީނުކޮށް، ދީނާއި ޚިލާފު ކަންތައް ކުރާކަމަށް ބުނެ އޭރުގެ އިދިކޮޅު މިހާރުގެ ވެރިކަމުގައި ތިއްބެވި ބޭފުޅުންތައް ވަރަށް ބޮޑަށް ނުރުހުން ފާޅުކޮށްފައިވެއެވެ. މިގޮތުން ކުރީ ސަރުކާރަކީ ލާދީނީ ކަންކަމަށް ހިތްވަރުދީ، އެފަދަ ކުށްތައް ކުރާ ފަރާތްތަކަށް ހިމާޔަތްދޭ ބައެއްގެ ގޮތުގައި ބުނެ ފާޑު ކިޔާފައިވެއެވެ.

ދިވެހީންގެ ރާއްޖޭގައި އިސްލާމީ ރިވެތި ވެރިކަމެއް ގާއިމުވެގެން ދާނެކަން އޭރުގެ ކެމްޕެއިންގ ޕޯޑިއަމްތަކުގައި ވަރަށް ގިނައިން ވާހަކަ ދެކެވިގެންދިޔައެވެ. މީގެ އިތުރުން ރާއްޖޭގެ ސަލަފުގެ ވެރިން ތާއީދުކޮށް ރާއްޖޭގައި އިސްލާމީ ރިވެތި އުސޫލުތައް ނަގަހައްޓަން ގެނައި މި ވެރިކަމަށް 6 މަސްވެގެން ދިޔައިރު ބަދަލުވެގެން ދިޔަ އެއްވެސް ކަމެއް ނެތޭ ބުންޏަސް ދޮގަކަށް ނުވާނެއެވެ.

މި މަހުގެ 24، ވާ ހުކުރު ދުވަހުގެ ރޭ ބޭއްވުމަށް ހަމަޖެހިފައިވާ މި ކަރޯކޭ ނައިޓް އެ ރޭ 20:30 އިން 00:00 އަށް ސޯޝަލް ސެންޓަރުގެ ހަރުގޭގައި އޮންނާނެ ކަމަށް މިނިސްޓްރީން ބުނެފައިވެއެވެ.

ދިވެހިރާއްޖޭގެ އެކި ސަރަހައްދުތަކުގައި ޑީޖޭ އާއި އަންހެން ފިރިހެން މަސްހުނިވެ ޕާޓީ ކުރުން ފަދަ ކަންކަން އާންމުވެ ސޯޝަލް މީޑިއާގައި މި ކަންކަމުގެ ވީޑިއޯތައް ވަރަށް ގިނައިން ދައުރުވަމުން ދާކަން ފާހަގަކުރެވިފައިވެއެވެ.