ރައީސް އޮފީހުގެ އިސް ތަރުޖަމާނު، ހީނާ ވަލީދު އަދި ކޮމިޔުނިކޭޝަން މިނިސްޓާރ އިބްރާހިމް ހަލީލް އަށް ވެސް ނޫސްވެރިންގެ ސުވާލުތަކަށް ޖަވާބު ނުދެވޭކަން ހާމަވެެއްޖެއެވެ.

ޗެނަލް 13 ގެ ފަރާތުން އެކި ފަހަރު މަތިން އިސް ތަރުޖަމާނު ހީނާއަށް ކޮށްފައިވާ ސުވާލުތަކަށް ޖަވާބު ދީފައިނުވާކަން ފާހަގަކޮށްލެވެއެވެ.

ސުވާލުތަކުގެ ޖަވާބު ހީނާގެ ފަރާތުން ނުލިބުމުން ޖަވާބު ހޯދުމަށްޓަކައި އެ ސުވާލުތައް ޗެނަލް 13 ގެ ފަރާތުން ވަނީ ރައީސް އޮފީހުގެ ކޮމިޔުނިކޭޝަން މިނިސްޓާރ އިބްރާހިމް ހަލީލްއާ ވެސް ކޮށްފައެވެ.

އަދި ހީނާގެ ފަރާތުން އެތަކެއް ދުވަސްވީއިރުވެސް، އެއްވެސް ޖަވާބެއް ލިބިފައިނުވާކަމަށް ބުނުމުން ހަލީލް ވިދާޅުވީ " ސުވާލުތަކަށް ޗީފް ސްޕޯކްސްޕާސަން ދެއްވާނެ" މިފަދައިންނެވެ.

ހީނާގެ ފަރާތުން ޖަވާބެއް ލިބިފައި ނުވާކަމަށް ބުނުމުންވެސް ހަލީލް ވަނީ އެ ސުވާލުތަކަށް ޖަވާބު ދިނުމުގެ ބަދަލުގައި ހީނާ ގާތުން އެ ސުވާލުތަކަށް ޖަވާބު ހޯދުމަށް ވިދާޅުވެފައެވެ.

މި ސަރުކާރުގައި އެއްވެސް މީޑިޔާއެއް ބްލެކްލިސްޓް ކޮށްފައި ނުވާނެ ކަމަށް ކޮމިޔުނިކޭޝަން މިނިސްޓާރ އިބްރާހިމް ހަލީލް ދާދި ފަހުން ދައުލަތުގެ މީޑިޔާ އަށް ދެއްވި އިންޓަވިޔުގައި ވަނީ ވިދާޅުވެފައެވެ.

ނަމަވެސް ފެނިގެން ދަނީ އެ ބޭފުޅުން ބޭނުން މީޑިޔާ އަކަށް މައުލޫމާތު ފޯރުކޮށްދެއްމުންދާ މަންޒަރެވެ.

މި ސަރުކާރަށް ވެރިކަން ލިބުމާއެކު ސޯޝަލް ސެންޓަރުގައި "ނޫސްވެރިންގެ ގުންޒަރު" ގެ ނަމުގައި ބޭއްވި ހަފްލާގައި ނޫސްވެރިކަމަށް މި ސަރުކާރުން އެއްބާރުލުން ދޭނެ މިންވަރު އަދުގެ ރައީސް ޑރ މުހައްމަދު މުއިއްޒު ވަނީ ވިދާޅުވެފައެވެ.

ނަމަވެސް ފެނިގެންދަނީ ސަރުކާރުގައި މައުލޫމާތު ދެއްވުމަށްޓަކައި ތިއްބަވާ ފަރާތްތަކުގެ އަމަލުތަކުގެ ސަބަބުން ނޫސްވެރިންގެ މަސައްކަތައް ބުރުއަރާ ފަދަ މަންޒަރުތަކެވެ.

ކަންމިހެން ހުރި އިރު، ދާދި ފަހުން ރައީސް އޮފީހުން އާރުޓީއައި ގާނޫނަށް އަމަލުނުކުރާ މައްސަލަ ބަލަން އިންފޮމޭޝަން ކޮމިޝަނަރު ވެސް ވަނީ ނިންމަވާފައެވެ.

ހާމަކަން ބޮޑު ސަރުކާރެއްގެ ގޮތުގައި ދައުވާ ކުރާއިރު ސަރުކާރުގެ ގިނަ ކަން ކަން ހުރީ ސިއްރުކޮށްފައިކަން ވެސް ފާހަގަކޮށްލެވެއެވެ.