އީރާނުގެ ރައީސް އިބްރާހިމް ރައީސީ އާއި އެހެން އޮފިޝަލުން ދަތުރުކުރައްވަމުންދިޔަ ހެލިކޮޕްޓަރެއް މޫސުން ގޯސްވެ އެގައުމުގެ ފަރުބަދަމަތީ ފަޅު ސަރަހައްދަކަށް ވެއްޓުމުގެ ސަބަބުން އޭގެން ދަތުރު ކުރި އެންމެން އަވަހާރަވެއްޖެއެވެ.

އިރާން ސަރުކާރުގެ ބައެއް އިސް އޮފިޝަލުންނާ ހަވާލާދީ ބޭރު މީޑިއާތަކުންވަނީ ހެލިކޮޕްޓަރު ވެއްޓުނު ހާދިސާގައި އީރާނުގެ ރައީސް އިބްރާހީމް ރައީސީ އަވަހާރަވެފައިވާކަމަށް ރިޕޯޓް ކޮށްފައެވެ. އެ ޤައުމުގެ މީޑިއާތަކުން އަދި އިރާން ސަރުކާރުގެ މިހާރުގެ އަދި ކުރީގެ އިސް އޮފިޝަލުން ވަނީ ރައީސް އިބްރާހީމް ރައީސީ އަވާހަރަވިކަން ސޯޝަލްމީޑިއާގައި ހާމަކުރަމުންނެވެ.

އިރާނުގެ މީޑިއާތަކުން ރިޕޯޓުކޮށްފައިވާ ގޮތުގައި އެކްސިޑެންޓު ހިނގީ ރައީސީ، އެގައުމުގެ އަވަށްޓެރި އަޒަރުބައިޖާނަށް ކުރެއްވި ދަތުރުފުޅަށްފަހު އެނބުރި ގައުމަށް ވަޑައިގެންނެވި މަގުމަތީގައެވެ.

އިރާންގެ ރައީސް އިބްރާހީމް ރައީސީ އަވާހާރަވުމުން އެ ގައުމުގެ ރައީސްގެ މަގާމާ ދެން ހަވާލުވާނީ ނައިބުރައީސް މުހައްމަދު މޮޚްބެރްއެވެ. އަދި ރައީސަކު އިންތިހާބު ކުރުމަށް 50 ދުވަސް ތެރޭގައި އިންތިހާބެއް ބާއްވަންޖެހޭނެއެވެ.

އީރާނުގެ ސިޔާސީ މައިދާނުގައި ކޮންޒަވޭޓިވް އަދި ހަރުކަށި ފެކްޝަންތައް ތަމްސީލުކުރާ އުމުރުން 63 އަހަރުގެ ރައީސީ ގާތްގަނޑަކަށް ތިން އަހަރު ރައީސްކަން ކުރެއްވި އިރު، އަންނަ އަހަރު އަލުން އިންތިހާބުގައި ވާދަކުރެއްވުމުގެ ނިޝާންތައް ފެނިވަޑައިގެންނެވިއެވެ.

1985 ވަނަ އަހަރު ތެހެރާނަށް ވަޑައިގަތުމުގެ ކުރިން ރައީސީ ވަނީ ގިނަ ދާއިރާތަކެއްގައި ޕްރޮސެކިއުޓަރެއްގެ ގޮތުގައި ތަޖުރިބާ ހޯއްދަވާފައެވެ. އިންސާނީ ހައްގުތަކަށް މަސައްކަތް ކުރާ ޖަމިއްޔާތަކުން ބުނާ ގޮތުގައި ސިޔާސީ ގައިދީންގެ މަރުގެ ހުކުމް ތަންފީޒު ކުރުމުގެ ކަންކަން ބެއްލެވި ފަނޑިޔާރުންގެ ކޮމިޓީގައި އޭނާ ހިމެނިވަޑައިގަންނަވައެވެ.

ރައީސީ އަކީ އެންމެ މަތީ ލީޑަރު އަވަހާރަވެއްޖެ ހާލަތެއްގައި އެމަނިކުފާނުގެ ބަދަލުގައި މީހަކު ހޮވުމުގެ މަސައްކަތް ހަވާލުކޮށްފައިވާ އެސެމްބްލީ އޮފް އެކްސްޕާޓްސްގެ ގިނަ ދުވަސްތަކެއް ވަންދެން މެންބަރެއްގެ ގޮތުގައި ހުންނެވި ބޭފުޅެކެވެ.

ދެ އަހަރަށް ބަންޑާރަ ނައިބުގެ މަގާމަށް ވަޑައިގެންނެވީ 2014 ވަނަ އަހަރު އައްސްޓަން ޤުދުސް ރަޒާވީގެ ލީޑަރަކަށް ޚާމަނާއީ އައްޔަން ކުރެއްވުމުންނެވެ.

ރައީސީ ފުރަތަމަ ރިޔާސީ އިންތިޚާބަށް ކުރިމަތިލެއްވީ 2017 ވަނަ އަހަރު، މަރުކަޒީ ކޭމްޕްތަކާއި މެދުމިނުގެ ކޭމްޕްތައް ތަމްސީލު ކުރެއްވި ކުރީގެ ރައީސް ހަސަން ރޫހާނީއާ ދެކޮޅަށެވެ. ނަމަވެސް ރޫހާނީ ވަނީ އެ އިންތިހާބު ކާމިޔާބު ކުރައްވާފައެވެ.

ކުޑަ ދުވަސްކޮޅެއްގެ މެދުކެނޑުމަކަށް ފަހު 2019 ވަނަ އަހަރު ޚާމަނާއީ އައްޔަން ކުރެއްވި އީރާނުގެ ޝަރުއީ ނިޒާމުގެ އާ ވެރިޔާގެ ގޮތުގައި ސުރުޚީތަކަށް އަރަމުން ދިޔައީ ރައިސީ އަކީ އިންސާފު ގާއިމުކުރާ، ކޮރަޕްޝަނާ ދެކޮޅަށް ހަނގުރާމަކުރާ މީހެއް ކަމަށެވެ.

ވޯޓުލާ މީހުންގެ އަދަދު މަދުވެ، އިސްލާހީ އަދި މެދުމިނުގެ ކެންޑިޑޭޓުން ފުޅާދާއިރާއެއްގައި ޑިސްކޮލިފައި ވެފައިވާ ދަނޑިވަޅެއްގައި ރައީސީ ރައީސް ކަމަށް ވަޑައިގަތީ 2021 ވަނަ އަހަރުއެވެ.

އީރާނުގެ އެހެން އިސް އޮފިޝަލުން ފަދައިން އޭނާގެ އެންމެ ހަރުކަށި ވާހަކަތައް ޚާއްޞަކޮށްފައިވަނީ އިސްރާއީލާއި އެމެރިކާއަށާއި އެގައުމުތަކުގެ ހުޅަނގުގެ އެކުވެރި ޤައުމުތަކަށެވެ.

އޮކްޓޯބަރު މަހު ޣައްޒާއާ ދެކޮޅަށް ހަނގުރާމަ ފެށުނު ފަހުން އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގާ ނަސްލު ނައްތާލުމާއި،"ޤަތުލުއާންމު" ކުށްވެރި ކުރައްވައި ގިނަ ތަގުރީރުތަކެއް ދެއްވި އިރު، ބައިނަލްއަގްވާމީ މުޖުތަމައުން ތަދައްޚުލްވުމަށް ގޮވާލެއްވިއެވެ.

އިސްރާއީލުން ސީރިއާގައި ހުންނަ ތެހެރާންގެ ކޮންސިއުލޭޓް އިމާރާތް ގޮއްވާލައި، އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ)ގެ ހަތް މެމްބަރަކު މަރާލުމާ ގުޅިގެން އިޒްރޭލުން ބަދަލު ހިފާނެ ކަމަށް އޭނާ ވައުދުވެވަޑައިގެންނެވިއެވެ.

އަދި އިޒްރޭލުގެ ބައިވެރިންގެ އިއްތިހާދުން ވައްޓާލި އެތައް ސަތޭކަ ޑްރޯން ތަކާއި މިސައިލްތަކެއް އިޒްރޭލަށް ފޮނުވާލުމަށް އީރާނުން ދިން ޖަވާބަށް އޭނާ މަރުހަބާ ދެންނެވިއެވެ.

ރައީސީ ވަނީ ދުނިޔޭގެ ބާރުތަކާ އެކު 2015 ވަނަ އަހަރު އީރާނުން ވެފައިވާ ނިއުކްލިއާ އެއްބަސްވުމުގައި ނުވަތަ 2018 ވަނަ އަހަރު އެމެރިކާގެ ކުރީގެ ރައީސް ޑޮނަލްޑް ޓްރަމްޕް އެއްފަރާތުން ވަކިވެވަޑައިގަތުމުން ދަތިތަކެއް ކުރިމަތިވެފައިވާ ޖޮއިންޓް ކޮމްޕްރިހެންސިވް ޕްލޭން އޮފް އެކްޝަން (ޖޭސީޕީއޯއޭ) އާ މެދު ފާރަވެރިވެފަ އެވެ.

އޭނާ އަކީ އީރާނަށް ކުރިމަތިވި އެންމެ ހަރުކަށި ދަތިކުރުމުގެ ފިޔަވަޅުތަކާ ކުރިމަތިލާން ޖެހުނު - ނިއުކްލިއާ އެއްބަސްވުން ފުނޑުފުނޑުވެގެން ދިޔަ ފަހުން - ޚާމަނާއީ ގެންގުޅުއްވި "ދެކޮޅުވެރިކަމާއި" "ރެސިލިއެންސް" ގެ ސްޓްރެޓެޖިކް ސިޔާސަތުގެ ޗެމްޕިއަނެކެވެ.

އައިއާރްޖީސީގެ ގާތް އެކުވެރިއެއްގެ ގޮތުގައި ހުންނެވި ރައީސީއަކީ އިރާގާއި ސީރިއާ އާއި ލުބްނާން އަދި ޔަމަނުގެ އިތުރުން މުޅި ސަރަހައްދުގައި އީރާނުން ތާއީދުކުރާ ސިޔާސީ އަދި ހަތިޔާރު އެޅި ޖަމާއަތްތަކުގެ "އެކްސިސް އޮފް ރެސިސްޓެންސް" އަށް ވެސް ވަރަށް ބޮޑަށް ތާއީދު ކުރައްވާ ބޭފުޅެކެވެ.

އޭނާއަކީ ސީރިއާގެ ރައީސް ބައްޝާރުލް އަސަދަށް ވަރުގަދަ ތާއީދެއް ދެއްވި ބޭފުޅެކެވެ.