އީރާނުގެ ރައީސް އިބްރާހިމް ރައީސީ އަވަހާރަވުމާ ގުޅިގެން ދިވެހި ގައުމީ ދިދަ ތިން ދުވަހަށް ބައިދަނޑިއަށް ތިރިކުރަން ނިންމައިފިއެވެ.

މި ނިންމުން ނިންމާ ރައީސް އޮފީހުން ހާމަކޮށްފައިވާ ގޮތުގައި، އީރާންގެ ރައީސް ރައީސީ އަވަހާރަވުމާ ގުޅިގެން ރަސްމީ ގޮތުން ހިތާމަފާޅުކޮށް، ދިވެހި ދިދަ ބައި ދަނޑިއަށް ތިރިކުރަން ރައީސް މުހައްމަދު މުއިއްޒު ނިންމަވާފައިވާ ކަމަށެވެ. އެހެންވެ، ބުރާސްފަތި ދުވަހުގެ ނިޔަލަށް ގައުމީ ދިދަ ބައިދަނޑިއަށް ތިރިކުރަން ވަނީ ނިންމައިފައެވެ.

އިރާން ސަރުކާރުގެ ބައެއް އިސް އޮފިޝަލުންނާ ހަވާލާދީ ބޭރު މީޑިއާތަކުންވަނީ ހެލިކޮޕްޓަރު ވެއްޓުނު ހާދިސާގައި އީރާނުގެ ރައީސް އިބްރާހީމް ރައީސީ އަވަހާރަވެފައިވާކަމަށް ރިޕޯޓް ކޮށްފައެވެ. އެ ޤައުމުގެ މީޑިއާތަކުން އަދި އިރާން ސަރުކާރުގެ މިހާރުގެ އަދި ކުރީގެ އިސް އޮފިޝަލުން ވަނީ ރައީސް އިބްރާހީމް ރައީސީ އަވާހަރަވިކަން ސޯޝަލްމީޑިއާގައި ހާމަކުރަމުންނެވެ.

އިރާނުގެ މީޑިއާތަކުން ރިޕޯޓުކޮށްފައިވާ ގޮތުގައި އެކްސިޑެންޓު ހިނގީ ރައީސީ، އެގައުމުގެ އަވަށްޓެރި އަޒަރުބައިޖާނަށް ކުރެއްވި ދަތުރުފުޅަށްފަހު އެނބުރި ގައުމަށް ވަޑައިގެންނެވި މަގުމަތީގައެވެ.