އީރާނުގެ ރައީސް އިބްރާހީމް ރައީސީ ދަތުރުކުރައްވަމުން ގެންދެވި ހެލިކޮޕްޓަރު ވެއްޓުނު ހާދިސާއާ ގުޅިގެން އެތައް ސުވާލުތަކެއް އުފެދިއްޖެއެވެ.

އެގޮތުން އީރާނުގެ ރައީސް އިބްރާހިމް ރައީސީ އާއި ހާރިޖީ ވަޒީރުގެ އިތުރުން 2 އޮފިޝަލަކު ދަތުރު ކުރައްވަނިކޮށް ފަރުބަދަ ތަކުގެ ތެރެއަށް ވެއްޓި ހެލިކޮޕްޓަރު ގެއްލުނު ހާދިސާ ހިނގާފައިވަނީ ރޭގެ ވަގުތެއްގައެވެ.

ނަމަވެސް މި ދަތުރުގައި ޖުމްލަ ތިން ހެލިކޮޕްޓަރެއް ބައިވެރިވެފައިވާއިރު ހަމައެކަނި ރައިސީ އިންނެވި ހެލިކޮޕްޓަރު މޫސުން ގޯސްވެގެން ވެއްޓެން ދިމާވި ސަބަބަކީ އޭގައި ގިނަ ސުވާލުތަކެއް އުފެދޭނެ ޖާގަ އޮތްކަމެކެވެ.

ހެލިކޮޕްޓަރު ވެއްޓުނު ހާދިސާގައި އީރާނުގެ ރައީސް ޑރ. ސައްޔިދު އިބްރާހިމް ރައީސީ އަވަހާރަވިކަން ކަށަވަރުކޮށްދިނުމާއެކު، އީރާނުން މިވަނީ އޭނާއަށް ޝަހީދެއްގެ ދަރަޖަދީފައެވެ. މީގެ އެނގެނީ ގޮތް ނޭނގޭ ކަންތައްތަކެއް މިހާދިސާގެ ތެރޭގައި ހިނގާފައިވާ ކަމެވެ.

އީރާނުގެ ރައީސް އިބްރާހިމް ރައީސީއަށް ބަލާލާއިރު އޭނާއަކީ ދުނިޔޭގައި މިހާރު ގިނަ ބައެއްގެ ސަމާލުކަން ހޯދާފައިފައިވާ ފަލަސްތީނު އިޒްރޭލު ހަނގުރާމައިގައި ފަލަސްތީނުގެ ހައްގުގައި އެންމެ ބޮޑަށް އަޑުއުފުއްލަވައި، ފަލަސްތީނު ރައްޔިތުންނަށް އެންމެ ބޮޑަށް އެހީތެރިކަމާއި މަދަދު ދެއްވަމުން ގެންދެވި ލީޑަރުކަން ފާހަގަކޮށްލެވެއެވެ.

އެގޮތުން އިސްތިއުމާރީ އިސްރާއީލާ ދެކޮޅަށް ހަރުކަށި ފިޔަވަޅުތަކެއް އަޅުއްވަމުން އިސްރާއީލުން ފަލަސްތީނުގައި މިހާރު ހިންގަމުންގެންދާ ނަސްލުނައްތާލުމުގެ ޖަރީމާއާ ދެކޮޅަށް، ފާޅުގައި އެންމެ ބޮޑަށް އަޑުއުފުއްލެވި އިސްލާމީ ލީޑަރަކީވެސް އީރާނުގެ ރައީސް ރައިސީއެވެ.

އަވަށްޓެރި އަޒަރބައިޖާންގައި އޮތް ރަސްމިއްޔާތަކަށްފަހު އެނބުރި ވަޑައިގަތް މަގުމަތީގައި މޫސުން ގޯސްވެ ދުންފުނީގެ ތެރެއަށް ހެލިކޮޕްޓަރު ނުރައްކާތެރި ލޭނޑިން އެއްކޮށް ހެލިކޮޕްޓަރުގައި ތިބި އެންމެން މަރުވެފައިވާ ކަމަށް ރިޕޯޓުކުރިއިރު، އަޒަރބައިޖާންގައި ބޭއްވި ރަސްމިއްޔާތުގައިވެސް އީރާނުގެ ރައީސްވަނީ، ދުޝްމަން އިސްރާއީލާ ދެކޮޅަށް ގުޅިފައިވާ ފައުޖެއް އެކުލަވާލަން ގޮވާލައްވާ ފަލަސްތީނު ރައްޔިތުންނަށް އެތައް ހިތްވަރެއް ވެސް ދެއްވާފައެވެ.

އީރާނުގެ ރައީސް ދަތުރުކުރެއްވި ގާފިލާގައި 3 ހެލިކޮޕްޓަރު ހިމެނޭއިރު، މޫސުން ގޯސްވިޔަސް އަނެއް 2 ހެލިކޮޕްޓަރު ސަލާމަތުން މަންޒިލަށް ދަތުރުކުރިއިރު، ރައީސް އިންނެވި ހެލިކޮޕްޓަރު ވެއްޓެންޖެހުނު ސަބަބާ މެދު ގިނަ ތިއަރީތަކެއް މިސް މީޑިޔާގައި ގިނަ ބަޔަކު ގެންދަނީ ނެރެމުންނެވެ.

މި ހާދިސާއާ، އިސްރާއީލުގެ ޖާސޫސީ އިދާރާ މޮސާޑާ އާވެސް ގުޅުން އޮތް ކަމަށް ބައެއް ފަރާތްތަކުން މީޑިޔާތަކުގައި ރިޕޯޓުކުރި ނަމަވެސް އިރާނުން އަދި މިކަމާ ރަސްމީބަހެއް ބުނެފައިނުވެއެވެ. ނަމަވެސް ބްރާހިމް ރައީސީ ދަތުރުކުރެއްވި ހެލިކޮޕްޓަރު ވެއްޓުނު ހާދިސާގެ ފުރިހަމަ ތަހްގީގެއް އީރާނުން ހިންގާނެކަމީ ޔަގީންކަމެވެ.

އެހެންކަމުން ކުރިއަށް މިއޮތީ މުޅި މެދު އިރުމައްޗާ ދުނިޔެވެސް ނޭވާ ހިފަހައްޓާލަން ޖެހޭ ފަދަ ވަގުތުކޮޅުތަކެކެވެ.

އިބްރާހިމް ރައީސީ އަވަހާރަވުމަކީ މުޅި އިސްލާމީ އުއްމަތަށް، ޚާއްސަކޮށް ފަލަސްތީނު ރައްޔިތުންނަށް ލިބުނު ނުހަނު ބޮޑު ފުން ހިތާމައެކެވެ.