ޔުނައިޓެޑް އަރަބް އެމިރޭޓްސް އިން ޕާކިސްތާނަށް 10 ބިލިއަން ޑޮލަރުގެ އިންވެސްޓްމެންޓް އެއް ދިނުމާއި ގުޅިގެން ކުރީގެ ނައިބު ރައީސް ޑރ މުހައްމަދު ޖަމީލް އަހްމަދު ސަރުކާރަށް ފާޑު ވިދާޅުވެއްޖެއެވެ.

ޖަމީލް އެކްސްގައި ޕޯސްޓް ކުރައްވައި ވިދާޅުވެފައިވަނީ އަސްލު އިތުބާރާއި ލީޑަރޝިޕަކީ މިއީ ކަމުގައެވެ. އަދި ގައުމަށް އިސްކަންދީ، އާމްދަނީ ހޯދުމުގެ އިތުރު ގޮތްތައް ހޯދުމުގެ ބަދަލުގައި މަގާމާއި ހަވާލުވުމުން ރައީސް ޑރ މުއިއްޒު އުޅުއްވީ ތުރުކީ އަދި ޗައިނާ އަށް ދަތުރުކުރުމުގައި ކަމަށެވެ.

ސަރުކާރުގެ ވަޒީރުންނާއި އިސްވެރިން އަރަބި ގައުމުތަކަށް ގިން ދަތުރުތަކެއް މިހާތަނަށް ކޮށްފައިވާއިރު، ދަރަނިވެރިވެފައިވާ ދިވެހިރާއްޖޭގެ އިގްތިސާދު ރަނގަޅު ކުރުމަށް އެއްވެސް މަސައްކަތެއް ކޮށްފައިނުވާ ކަމަށް މަލީހް ފާހަގަކުރެއްވިއެވެ.

މީގެއިތުރުން، އެއްވެސް ކަހަލަ ހަރުދަނާ ލަނޑުދަނޑިތަކެއް އަމާޒުނުކުރެވި ގައުމު ދަނީ ބޮޑު އަނދަވަޅަކާއި ދިމާލަށް ކަމަށާއި، އިގްތިސާދީ ގޮތުން ބޮޑެތި ގެއްލުންތައް ދަނީ ކުރިމަތިވަމުން ކަމަށް ޖަމީލްގެ އިތުރުން ގިނަ ތަޖުރިބާކާރުން ދަނީ ފާހަގަކުރަމުންނެވެ.