ކުރިން ވިދާޅުވީ ކްލައިމެޓް ޗޭންޖަކީ ހަގީގަތެއް ނޫން ކަމަށް، ނަމަވެސް މިހާރު ކްލައިމެޓް ޗޭންޖުގެ ރޮނގުން ރާއްޖެއަށް 500 މިލިއަން ޑޮލަރުގެ އެހީ ބޭނުންވާ ކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެއެވެ.

ރިޔާސީ އިންތިޚާބް ކާމިޔާބު ކުރެއްވުމަށްފަހު ދުނިޔޭގެ މަޝްހޫރު ނިއުސް ޗެނަލެއް ކަމަށްވާ "އަލް ޖަޒީރާ" އަށް ދެއްވި ބަސްދީ ގަތުމެއްގައި އެމަނިކުފާނު ވަނީ ކްލައިމެޓް ޗޭންޖަކީ އޭގައި އެއްވެސް ހަގީގަތެއް އެކުލެވޭ އެއްޗެއް ނޫންކަމަށް ވިދާޅުވެފައެވެ.

ނަމަވެސް މިފަހުން އެމަނިކުފާނުގެ ރާގު ވަނީ ބަދަލުވެފައެވެ.

ހޮނިހިރު ދުވަހު އިނގިރޭސިވިލާތުގެ ނޫހެއް ކަމަށްވާ ދަ ގާޑިއަން ގައި ޝާއިއު ކުރެއްވި ލިޔުމެއްގައި ރައީސް މުއިއްޒު ވަނީ މިހާރު ކްލައިމެޓް ޗޭންޖުގެ ރޮނގުން ރާއްޖެއަށް 500 މިލިއަން ޑޮލަރުގެ އެހީ ބޭނުންވާކަމަށް ވިދާޅުވެފައެވެ.

މޫސުމަށް އަންނަ ބަދަލުތަކުން ރާއްޖެއަށް ލިބޭ ގެއްލުން ތަކުން ރައްކާތެރިކަން ހޯދަން ރާއްޖެއަށް ބޭނުންވާ ފައިސާ ރާއްޖެއިން އަމިއްލަ އަށް ހޯދުމަށް ނުކުޅެދިފައިވާ ކަމަށް ވެސް ރައީސް މުއިއްޒު ވަނީ ވިދާޅުވެފައެވެ.

ކުރިން ބުނި އެތި ކެންސަލް ކުރުމަށްފަހު ރައީސް މުއިއްޒު ބޭރުގެ ގައުމުތަކުން ފައިސާގެ އެހީއަށް ސަލާން ޖަހަމުންގެންދާތީ ގިނަ ފަރާތްތަކުން އަންނަނީ އެކަމާ ފާޑުކިޔަމުންނެވެ.

މިވަގުތު ރައީސް މުއިއްޒު ވަނީ ސްމޯލް އައިލެންޑް ޑިވެލޮޕިން ސްޓޭޓްސް ކޮންފަރެންސް ހޯމަ ދުވަހު އެންޓިގުއާ އެންޑް ބާބޫޑާގައި ފެށޭތީ ކޮންފަރެންސްގައި ބައިވެރިވެވަޑައިގަތުމަށްޓަކައި ވަޑައިގެންފައެވެ.