20 ވަނަ ރައްޔިތުންގެ މަޖިލިސް ހީވަނީ ނުކިޔަވާ ކުދިންގެ އީދު އައިސްފައި އޮތްހެން ކަމަށް ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ވިދާޅުވެއްޖެއެވެ.

އެކްސްގައި ކުރެއްވި ޕޯސްޓެއްގައި ޑރ. ޖަމީލު ވަނީ، ވެރިކަން ކުރާ ޕީއެންސީގެ ޕީޖީ ގުރޫޕްގެ ލީޑަރަކަށް އިނގުރައިދޫ ދާއިރާގެ މެންބަރު އިބްރާހީމް ފަލާހް ފަލަސްތީނުގައި ޔަހޫދީން ހިންގަމުން ގެންދާ ގަތުލު އާންމަކީ “ދެގައުމެއްގެ” ދާހިލީ ކަމެއްކަމަށް ބުނި ބުނުމަށް ފާޑުކިޔުއްވާފައިއެވެ.

ޖަމީލު ވިދާޅުވީ ފަލާހު ބުނަން އުޅުނީ އިނގިރޭސި ބަހެއް ބޭނުންކޮށްގެން މޮޅު އެއްޗެއް ކަމަށާއި އެހެންނަމަވެސް ފޮރިން އޭ ބުނުމަށް ފަހު ފަލާހު ވަނީ ވިދިފައިކަމަށެވެ.

މީގެ އިތުރުން ޑރ ޖަމީލު ވިދާޅުވީ ކަމެއް ކުރަން ނިކުންނަން ވާނީ އެކަން ވާވަރުން ކަމަށެވެ. 20 ވަނަ ރައްޔިތުންގެ މަޖިލިސް ފެނިގެން ދަނީ މިމަޖްލިހުގެ ރައީސާ ހަމައިން ފެށިގެން ގިނަ މެމްބަރުން ފެނުނީމަ ހީވަނީ ނުކިޔަވާ ކުދިންގެ އީދު އައިސްގެން އުޅޭހެން ކަމަށެވެ.

މި ސަރުކާރުން އެންޑޯސްކޮށްގެން މަޖިލީހާއި މަގާމުތަކަށް ބޭފުޅުން އައްޔަނު ކުރައްވާނީ ތައުލީމީ ބޭފުޅުން ކަމަށް ރައިސް ޑރ. މުޙައްމަދު މުއިއްޒު ވަނީ ވިދާޅުވެފައިއެވެ. ނަމަވެސް ފެންނަމުން މިދަނީ މިއާއި މުޅިން ދެކޮޅު މަންޒަރުތަކެކެވެ.